mera watan hindostan

merā vatan hindostāñ har raah jis kī kahkashāñ

koh-e-girāñ se kam nahīñ jis ke jiyāle naujavāñ

ye vīr-o-gautam kī zamīñ amn-o-ahinsā kā chaman

akbar ke ḳhvāboñ kā jahāñ chishtī-o-nānak kā vatan

sham.eñ hazāroñ haiñ magar hai ektā kī anjuman

tahzīb kā gahvāra haiñ gañg-o-jaman kī vādiyāñ

merā vatan hindostāñ

tārīḳh kī azmat hai ye jamhūriyat kī shaan hai

rūhāniyat kī ruuh hai sab maz.haboñ kī jaan hai

ye apnā hindostān hai ye apnā hindostān hai

hāsil yahāñ insān ko har tarah kī āzādiyāñ

merā vatan hindostāñ

jab dil se dil milte ga.e miTte ga.e sab fāsle

ye aaj kā naġhma nahīñ sadiyoñ ke haiñ ye silsile

sadiyoñ se mil kar hī baḌhe sab ahl-e-dil ke qāfile

ik saath uThtī hai yahāñ āvāz-e-nāqūs-o-azāñ

merā vatan hindostāñ

tārīḳh ke is moḌ par ham farz se ġhāfil nahīñ

qaabū na jis par pā sakeñ aisī koī mushkil nahīñ

jis ko na ham sar kar sakeñ aisī koī manzil nahīñ

haañ bāñkpan kī shaan se hai kārvāñ apnā ravāñ

merā vatan hindostāñ

mera watan hindostan har rah jis ki kahkashan

koh-e-giran se kam nahin jis ke jiyale naujawan

ye wir-o-gautam ki zamin amn-o-ahinsa ka chaman

akbar ke KHwabon ka jahan chishti-o-nanak ka watan

shamen hazaron hain magar hai ekta ki anjuman

tahzib ka gahwara hain gang-o-jaman ki wadiyan

mera watan hindostan

tariKH ki azmat hai ye jamhuriyat ki shan hai

ruhaniyat ki ruh hai sab mazhabon ki jaan hai

ye apna hindostan hai ye apna hindostan hai

hasil yahan insan ko har tarah ki aazadiyan

mera watan hindostan

jab dil se dil milte gae miTte gae sab fasle

ye aaj ka naghma nahin sadiyon ke hain ye silsile

sadiyon se mil kar hi baDhe sab ahl-e-dil ke qafile

ek sath uThti hai yahan aawaz-e-naqus-o-azan

mera watan hindostan

tariKH ke is moD par hum farz se ghafil nahin

qabu na jis par pa saken aisi koi mushkil nahin

jis ko na hum sar kar saken aisi koi manzil nahin

han bankpan ki shan se hai karwan apna rawan

mera watan hindostan