mere alfaz ko mahsus karo

mere alfāz ko chhū kar dekho

mere alfāz ko mahsūs karo

in meñ raqsāñ haiñ musaffā jazbe

in meñ pinhāñ haiñ dhaḌakte lamhe

in meñ taḳh.īl kā jaadū hai nihāñ

in meñ afkār kā dariyā hai ravāñ

in meñ miTTī kī hai sarshār mahak

in meñ tahzīb kī raushan hai jhalak

in meñ sarsabz rutoñ kī hai bahār

in meñ āvāra shaboñ kā hai ḳhumār

in meñ purvā.ī kī ThanDak bhī hai

in meñ tūfān kī dastak bhī hai

in meñ sangīt kī devī bhī hai

in meñ ehsās kī jyotī bhī hai

in meñ dariyā kī ravānī bhī hai

in meñ sahrā kī kahānī bhī hai

khiltī kaliyoñ kā tabassum bhī hai

zard pattoñ kā takallum bhī hai

surmagīñ sub.h kī dildārī hai

lamha-e-vasl kī sarshārī hai

sabz mausam kī dhanak hai in meñ

shāḳh-e-gul kī bhī lachak hai in meñ

in meñ sho.aloñ kī lapak hai dekho

in meñ chehroñ kī lalak hai dekho

dil ke reshoñ meñ inheñ jazb karo

phir inheñ zehn se chhū kar dekho

mere alfāz ko mahsūs karo

mere alfaz ko chhu kar dekho

mere alfaz ko mahsus karo

in mein raqsan hain musaffa jazbe

in mein pinhan hain dhaDakte lamhe

in mein taKHil ka jadu hai nihan

in mein afkar ka dariya hai rawan

in mein miTTi ki hai sarshaar mahak

in mein tahzib ki raushan hai jhalak

in mein sarsabz ruton ki hai bahaar

in mein aawara shabon ka hai KHumar

in mein purwai ki ThanDak bhi hai

in mein tufan ki dastak bhi hai

in mein sangit ki dewi bhi hai

in mein ehsas ki jyoti bhi hai

in mein dariya ki rawani bhi hai

in mein sahra ki kahani bhi hai

khilti kaliyon ka tabassum bhi hai

zard patton ka takallum bhi hai

surmagin subh ki dildari hai

lamha-e-wasl ki sarshaari hai

sabz mausam ki dhanak hai in mein

shaKH-e-gul ki bhi lachak hai in mein

in mein shoalon ki lapak hai dekho

in mein chehron ki lalak hai dekho

dil ke reshon mein inhen jazb karo

phir inhen zehn se chhu kar dekho

mere alfaz ko mahsus karo