mere wajud se wabasta sarzamin

ye zamīñ ye hasīñ sarzamīñ

jangaloñ parbatoñ sabza-zāroñ nashīlī havāoñ kī āmājgāh

is se rishta mirā

jism-o-jāñ kī tarah

ḳhvāhishoñ ārzūoñ umangoñ ke sail-e-ravāñ kī tarah

is kī miTTī kī soñdhī mahak

is kī barsāt kā har nam-e-jāvedāñ

is kī yaḳh-basta rātoñ kī shādābiyāñ

is kī jaltī huī dopahar kī lapak

gosht aur post meñ mere paivast hai

fāḳhta ke paroñ kī tarah

ye zamīñ

merī fikroñ kī dahlīz bhī

soch kā ḳhūbsūrat sā ā.īna bhī

mere ehsās-o-jazba kā ghar

mere lafz-o-navā ke liye mustaqil sā.ebāñ

jis ke saa.e tale

aaj merā vajūd

irtiqā kī na.ī manziloñ ke ta.ayyun meñ masrūf hai

ye zamin ye hasin sarzamin

jangalon parbaton sabza-zaron nashili hawaon ki aamajgah

is se rishta mera

jism-o-jaan ki tarah

KHwahishon aarzuon umangon ke sail-e-rawan ki tarah

is ki miTTi ki sondhi mahak

is ki barsat ka har nam-e-jawedan

is ki yaKH-basta raaton ki shadabiyan

is ki jalti hui dopahar ki lapak

gosht aur post mein mere paiwast hai

faKHta ke paron ki tarah

ye zamin

meri fikron ki dahliz bhi

soch ka KHubsurat sa aaina bhi

mere ehsas-o-jazba ka ghar

mere lafz-o-nawa ke liye mustaqil saeban

jis ke sae tale

aaj mera wajud

irtiqa ki nai manzilon ke tayyun mein masruf hai