meri pahli nazm

sadā kī mānind is baras bhī

tamām kavvoñ ke jhunD koyal mukuT pe qābiz

nashe meñ pāgal phudak rahe haiñ

fat.h pe apnī uchhal rahe haiñ

nirāsh koyal

ki jis ke siine meñ

huuk ban kar

udaas koyal

ki jis kī shah-e-rag pe

kuuk ban kar

hazār naġhme dhaḌak rahe haiñ

vo āshiyāne meñ ban ke gūñgī

paroñ meñ nannhī surīlī dilkash dhuneñ sameTe

sapāT niile falak ko chup-chāp dekhtī hai

jo is baras bhī

ye kah rahā hai

ḳhamosh rahnā

kabhī na kahnā

ki jab bhī koyal kī kuuk gūñjī

ye aap apnā mukuT siyānoñ se chhīn legī

ki jiite jī kyā tirī chahak ko

tirā gharauñdā

tū jis kā mehvar banī huī hai

tū jis meñ zinda chunī huī hai

ki jis kā farsh aur chhat bhī tū hī

jis kī dīvār-o-dar bhī tū hī

tū hī hai jis ghar kā rañg-o-roġhan

vahī tirā terī jaañ gharauñdā

tujhe yā tirī navā ko

zinda rihā karegā

rihā huī to gharauñdā kyā yuuñ sajā rahegā

sada ki manind is baras bhi

tamam kawwon ke jhunD koyal mukuT pe qabiz

nashe mein pagal phudak rahe hain

fath pe apni uchhal rahe hain

nirash koyal

ki jis ke sine mein

huk ban kar

udas koyal

ki jis ki shah-e-rag pe

kuk ban kar

hazar naghme dhaDak rahe hain

wo aashiyane mein ban ke gungi

paron mein nannhi surili dilkash dhunen sameTe

sapaT nile falak ko chup-chap dekhti hai

jo is baras bhi

ye kah raha hai

KHamosh rahna

kabhi na kahna

ki jab bhi koyal ki kuk gunji

ye aap apna mukuT siyanon se chhin legi

ki jite ji kya teri chahak ko

tera gharaunda

tu jis ka mehwar bani hui hai

tu jis mein zinda chuni hui hai

ki jis ka farsh aur chhat bhi tu hi

jis ki diwar-o-dar bhi tu hi

tu hi hai jis ghar ka rang-o-roghan

wahi tera teri jaan gharaunda

tujhe ya teri nawa ko

zinda riha karega

riha hui to gharaunda kya yun saja rahega