mir-anis

manzar-o-marsiya-o-razm-o-sarāpā kyā kyā

na likhā mīr-anīs aap ne tanhā kyā kyā

nazm meñ hotī hai kirdār-nigārī kyuuñ kar

aap dikhlā ga.e ham logoñ ko rasta kyā kyā

aur jazbāt-nigārī kī taraf ruḳh jo kiyā

rakh diyā khīñch ke qirtās pe naqsha kyā kyā

aap kī lauñDī fasāhat bhī balāġhat bhī huī

roz-marra se kalām apnā sajāyā kyā kyā

marsiya-goī banī muqtadir ik sinf-e-suḳhan

ya.anī is fan ko milā aap se rutba kyā kyā

fan tasadduq huā vaarī gayā andāz-e-bayāñ

aap ne likkhe shahīdoñ ke sarāpā kyā kyā

kis kis andāz se tahrīr kiyā hāl-e-sitam

ġham kiyā aap ne shāh-e-shohdā kā kyā kyā

razm tahrīr kiyā yuuñ ki jahāñ kaañp uThā

marsiya likh ke zamāne ko rulāyā kyā kyā

jañg-e-abbās-e-dilāvar kā bayāñ paḌhte hue

sāmne āñkhoñ ke lahrātā hai dariyā kyā kyā

jaise ḳhud bhī rahe hoñ shāmil-e-fauj-e-shabbīr

haal is jañg kā duniyā ko sunāyā kyā kyā

sāhibo ye hai mire ghar kī zabāñ kahte hue

bazm ko aap ne baḳhshā hai ujālā kyā kyā

ālamī sher-o-adab meñ huī urdu bhī sharīk

aap ne zor-e-kalām apnā dikhāyā kyā kyā

mīr-anīs aap ke faizān-e-karam se ham ko

aa gayā nazm-nigārī kā salīqa kyā kyā

na huā par na huā 'mīr' kā andāz nasīb

'nāzish' aġhyār ne yuuñ zor to maarā kyā kyā

manzar-o-marsiya-o-razm-o-sarapa kya kya

na likha mir-anis aap ne tanha kya kya

nazm mein hoti hai kirdar-nigari kyun kar

aap dikhla gae hum logon ko rasta kya kya

aur jazbaat-nigari ki taraf ruKH jo kiya

rakh diya khinch ke qirtas pe naqsha kya kya

aap ki launDi fasahat bhi balaghat bhi hui

roz-marra se kalam apna sajaya kya kya

marsiya-goi bani muqtadir ek sinf-e-suKHan

yani is fan ko mila aap se rutba kya kya

fan tasadduq hua wari gaya andaz-e-bayan

aap ne likkhe shahidon ke sarapa kya kya

kis kis andaz se tahrir kiya haal-e-sitam

gham kiya aap ne shah-e-shohda ka kya kya

razm tahrir kiya yun ki jahan kanp uTha

marsiya likh ke zamane ko rulaya kya kya

jang-e-abbas-e-dilawar ka bayan paDhte hue

samne aankhon ke lahraata hai dariya kya kya

jaise KHud bhi rahe hon shamil-e-fauj-e-shabbir

haal is jang ka duniya ko sunaya kya kya

sahibo ye hai mere ghar ki zaban kahte hue

bazm ko aap ne baKHsha hai ujala kya kya

aalami sher-o-adab mein hui urdu bhi sharik

aap ne zor-e-kalam apna dikhaya kya kya

mir-anis aap ke faizan-e-karam se hum ko

aa gaya nazm-nigari ka saliqa kya kya

na hua par na hua 'mir' ka andaz nasib

'nazish' aghyar ne yun zor to mara kya kya