mir-e-karwan

sub.h-e-sādiq kī tarah raushan hai baapū terī zaat

zau-fishāñ hai hind kī tārīḳh meñ terā sabāt

paak bātin paak tīnat azm ke koh-e-girāñ

ḳhādim-e-qaum-o-vatan ai nāzish-e-hindostāñ

ḳhūbiyoñ se dast-e-qudrat ne sañvārā hai tujhe

irtiqā.ī manziloñ ne jab pukārā hai tujhe

tere aḳhlāq-o-mohabbat kā ajab andāz hai

jis ko dekho aaj vo terā hī ham-āvāz hai

terī pā-mardī ne zanjīr-e-ġhulāmī toḌ dī

mil gayā svārāj jab baapū to duniyā chhoḌ dī

tere istiqlāl par saarā zamāna dang thā

jang-e-āzādī ke laḌne kā nirālā Dhang thā

terī koshish se banā hindostāñ jannat-nishāñ

rāsta tū ne dikhāyā ban ke mīr-e-kārvāñ

aaj sar par hind ke fat.h-o-zafar kā taaj hai

tū diloñ meñ jalva-gar terā diloñ par raaj hai

is badalte daur meñ ye shān-o-azmat hai terī

mulk-o-millat ko bahut ab bhī zarūrat hai terī

qaum kā ik gauhar-e-nāyāb thā jo kho gayā

qaum kā ik jazba-e-betāb thā jo so gayā

rāsta batlā ke ai 'takmīl' vo rahbar gayā

aane vāloñ ke liye hamvār rāheñ kar gayā

subh-e-sadiq ki tarah raushan hai bapu teri zat

zau-fishan hai hind ki tariKH mein tera sabaat

pak baatin pak tinat azm ke koh-e-giran

KHadim-e-qaum-o-watan ai nazish-e-hindostan

KHubiyon se dast-e-qudrat ne sanwara hai tujhe

irtiqai manzilon ne jab pukara hai tujhe

tere aKHlaq-o-mohabbat ka ajab andaz hai

jis ko dekho aaj wo tera hi ham-awaz hai

teri pa-mardi ne zanjir-e-ghulami toD di

mil gaya swaraj jab bapu to duniya chhoD di

tere istiqlal par sara zamana dang tha

jang-e-azadi ke laDne ka nirala Dhang tha

teri koshish se bana hindostan jannat-nishan

rasta tu ne dikhaya ban ke mir-e-karwan

aaj sar par hind ke fath-o-zafar ka taj hai

tu dilon mein jalwa-gar tera dilon par raj hai

is badalte daur mein ye shan-o-azmat hai teri

mulk-o-millat ko bahut ab bhi zarurat hai teri

qaum ka ek gauhar-e-nayab tha jo kho gaya

qaum ka ek jazba-e-betab tha jo so gaya

rasta batla ke ai 'takmil' wo rahbar gaya

aane walon ke liye hamwar rahen kar gaya