mini-bus ka safar

conveyance kuchh bhī jab nazar aayā na daa.eñ baa.eñ

sochā ki aaj ham bhī mini-bus meñ baiTh jaa.eñ

jaanā thā lālū-khet chaḌhe the sadr se ham

ruḳhsat hue the sar-ba-kafan apne ghar se ham

har raah bus kī shahr-e-ḳhamoshāñ kī raah thī

har seat bus kī āḳhirī ārām-gāh thī

raqqās-e-ḳhush-adā kī tarah hil rahī thī bus

nā-āshnā Truck se gale mil rahī thī bus

fōtpath se bhī haath milātī huī chalī

Thumka qadam qadam pe lagātī huī chalī

purza har ek maz.har-e-chañg-o-raubāb thā

is bus kā ittifāq se bhoñpū ḳharāb thā

Dhīlī kamāniyoñ meñ tarannum balā kā thā

dekhā utar ke bus se to jhoñkā havā kā thā

gaane meñ Thīk-Thāk the chalne meñ weak the

is mahfil-e-samā.a meñ pahiye sharīk the

nāzuk samā.atoñ pe sitam Dhā rahī thī bus

ulTe suroñ meñ koī ġhazal gā rahī thī bus

ho to ga.e the bus meñ musāfir sab adjust

Dar thā ki ho na jaa.e kahīñ tyroñ meñ burst

bus meñ sikuḌ ke thaan se chit ho ga.e the ham

purze the aur machine meñ fiT ho ga.e the ham

jo kuchh bhī mil rahā thā liye jā rahe the ham

dhakkoñ kī geñd catch kiye jā rahe the ham

majbūr ho ga.e the jamīl o hasīn log

murġhā bane hue the muazziz-tarīn log

bus meñ misāl-e-shāḳh-e-samar jhuk ga.e the log

ḳhuddār o sar-buland the par jhuk ga.e the log

kuchh shauqiya the kuchh ba-irāda jhuke hue

azmat-miyāñ the sab se zyāda jhuke hue

āzād tab.a vāqif-e-garaje hī na thī

signal kī battiyoñ kī to muhtāj hī na thī

stop se chalī to rukī ik dukān meñ

āḳhir use panāh milī sā.ebān meñ

vo log chal diye jo sar-e-rahguzar na the

''manzil unheñ milī jo sharīk-e-safar na the''

conweyance kuchh bhi jab nazar aaya na daen baen

socha ki aaj hum bhi mini-bus mein baiTh jaen

jaana tha lalu-khet chaDhe the sadr se hum

ruKHsat hue the sar-ba-kafan apne ghar se hum

har rah bus ki shahr-e-KHamoshan ki rah thi

har seat bus ki aaKHiri aaram-gah thi

raqqas-e-KHush-ada ki tarah hil rahi thi bus

na-ashna Truck se gale mil rahi thi bus

footpath se bhi hath milati hui chali

Thumka qadam qadam pe lagati hui chali

purza har ek mazhar-e-chang-o-raubab tha

is bus ka ittifaq se bhonpu KHarab tha

Dhili kamaniyon mein tarannum bala ka tha

dekha utar ke bus se to jhonka hawa ka tha

gane mein Thik-Thak the chalne mein weak the

is mahfil-e-samaa mein pahiye sharik the

nazuk samaaton pe sitam Dha rahi thi bus

ulTe suron mein koi ghazal ga rahi thi bus

ho to gae the bus mein musafir sab adjust

Dar tha ki ho na jae kahin tyron mein burst

bus mein sikuD ke than se chit ho gae the hum

purze the aur machine mein fiT ho gae the hum

jo kuchh bhi mil raha tha liye ja rahe the hum

dhakkon ki gend catch kiye ja rahe the hum

majbur ho gae the jamil o hasin log

murgha bane hue the muazziz-tarin log

bus mein misal-e-shaKH-e-samar jhuk gae the log

KHuddar o sar-buland the par jhuk gae the log

kuchh shauqiya the kuchh ba-irada jhuke hue

azmat-miyan the sab se zyaada jhuke hue

aazad taba waqif-e-garaje hi na thi

signal ki battiyon ki to muhtaj hi na thi

stop se chali to ruki ek dukan mein

aaKHir use panah mili saeban mein

wo log chal diye jo sar-e-rahguzar na the

manzil unhen mili jo sharik-e-safar na the