mera KHwab thin jo mohabbaten

mirī ārzūoñ ke devtā

maiñ ajiib thī maiñ ajab rahī

mujhe dasht-e-ġham ko bhī chhānne kī talab rahī

mirī baat meñ koī raat aa ke Thahar ga.ī

mirī zaat meñ koī zaat aa ke guzar ga.ī

mujhe phir bhī dard ko jāñchne kī talab rahī

ka.ī ranj bhī haiñ nadāmatoñ se mile hue

ka.ī shahr bhī haiñ adāvatoñ se bhare hue

kisī ġham ke zor se zard hai mirā shahr bhī

mujhe yaad hai kisī shām-e-ġham kā vo qahr bhī

ye jo log haiñ ye baḌe ajiib se log haiñ

ye abhī talak na samajh sake

hai kamāl kyā

hai mohabbatoñ kā junūb kyā

hai shumāl kyā

hai urūj-e-dard-e-habīb kyā

hai zavāl kyā

ye samajh sake hī nahīñ

hai ham ko malāl kyā

mujhe vasl-e-yār ke falsafe pe yaqīn hai

ye jo hijr hai ye kisī gumān se kam nahīñ

mirī aañkh dasht hai

muddatoñ se jo nam nahīñ

sabhī kuchh hai bas yahāñ tum nahīñ

ai habīb-e-man

ai tabīb-e-jāñ

ye jo chāshnī hai hurūf meñ

tirī den hai

ye jo naqsh haiñ mirī aañkh meñ

hai tirā karam

jo miThās hai mirī baat meñ

tirī baat hai

mirā mujh meñ kuchh bhī nahīñ rahā

tirī zaat hai

ai faqīh-e-shahr tirā bayān bhī jhuuT hai

mujhe ishq hai to phir is meñ koī dalīl kyā

mujhe zabt miltā hai roz gar

to ye dard dard-e-sabīl kyā

mirī ārzūoñ ke devtā

zarā dekh le

mirī ruuh vajd kī kaifiyat meñ ghirī huī

maiñ jo saañs saañs marī huī

tire dar pe kab se paḌī huī

kabhī dekh le

kabhī saar le

ye batā mujhe

hai qusūr kyā

mire devtā mire bādshāh

baḌe zaḳhm haiñ

baḌe zaḳhm haiñ mirī ruuh par

tujhe terī shaan kā vāsta

mire indimāl ke vāste

zarā muskurā

zarā muskurā ki sukūñ mile

zarā duur mujh se fishār ho

mire chār-sū tirā pyaar ho

mire jism-o-jāñ kī ḳhizāoñ meñ bhī bahār ho

to phir is ke baad vazāhateñ

ye adāvateñ

mujhe kab haiñ raas saḳhvāteñ

vahī āfateñ

ye musībateñ

mirī zaḳhm-zaḳhm aqīdateñ

mirī dard dard irādateñ

maiñ haqīqatoñ se kaTī huī mire chārāgar

mujhe raas aa.iiñ aziyyateñ

mirā ḳhvāb thiiñ jo mohabbateñ

meri aarzuon ke dewta

main ajib thi main ajab rahi

mujhe dasht-e-gham ko bhi chhanne ki talab rahi

meri baat mein koi raat aa ke Thahar gai

meri zat mein koi zat aa ke guzar gai

mujhe phir bhi dard ko jaanchne ki talab rahi

kai ranj bhi hain nadamaton se mile hue

kai shahr bhi hain adawaton se bhare hue

kisi gham ke zor se zard hai mera shahr bhi

mujhe yaad hai kisi sham-e-gham ka wo qahr bhi

ye jo log hain ye baDe ajib se log hain

ye abhi talak na samajh sake

hai kamal kya

hai mohabbaton ka junub kya

hai shumal kya

hai uruj-e-dard-e-habib kya

hai zawal kya

ye samajh sake hi nahin

hai hum ko malal kya

mujhe wasl-e-yar ke falsafe pe yaqin hai

ye jo hijr hai ye kisi guman se kam nahin

meri aankh dasht hai

muddaton se jo nam nahin

sabhi kuchh hai bas yahan tum nahin

ai habib-e-man

ai tabib-e-jaan

ye jo chashni hai huruf mein

teri den hai

ye jo naqsh hain meri aankh mein

hai tera karam

jo miThas hai meri baat mein

teri baat hai

mera mujh mein kuchh bhi nahin raha

teri zat hai

ai faqih-e-shahr tera bayan bhi jhuT hai

mujhe ishq hai to phir is mein koi dalil kya

mujhe zabt milta hai roz gar

to ye dard dard-e-sabil kya

meri aarzuon ke dewta

zara dekh le

meri ruh wajd ki kaifiyat mein ghiri hui

main jo sans sans mari hui

tere dar pe kab se paDi hui

kabhi dekh le

kabhi sar le

ye bata mujhe

hai qusur kya

mere dewta mere baadshah

baDe zaKHm hain

baDe zaKHm hain meri ruh par

tujhe teri shan ka wasta

mere indimal ke waste

zara muskura

zara muskura ki sukun mile

zara dur mujh se fishaar ho

mere chaar-su tera pyar ho

mere jism-o-jaan ki KHizaon mein bhi bahaar ho

to phir is ke baad wazahaten

ye adawaten

mujhe kab hain ras saKHwaten

wahi aafaten

ye musibaten

meri zaKHm-zaKHm aqidaten

meri dard dard iradaten

main haqiqaton se kaTi hui mere chaaragar

mujhe ras aain aziyyaten

mera KHwab thin jo mohabbaten