mere charagh bujh gae

mire charāġh bujh ga.e

maiñ tīrgī se raushnī kī bhiik māñgtā rahā

havā.eñ sāz-bāz kar rahī thiiñ jin dinoñ siyāh raat se

unhī siyāh sā.atoñ meñ sāneha huā

tamām ā.īne ġhubār se be-nūr ho ga.e

sarā ke chaar samt haul-nāk shab kī ḳhāmushī

chamaktī aañkh vaale bheḌiyoñ ke ġhol le ke aa ga.ī

qabā-e-zindagī vo phaaḌ le ga.e nukīle nāḳhunoñ se us tarah

ki ruuh chīthaḌoñ meñ baT ga.ī

ḳharāb mausamoñ kī chaal thī ki ās-pās bāñbiyoñ se

aa ga.e nikal ke saañp jhūmte hue

bujhā diyā safed raushnī kā dil

madad ko maiñ pukārtā thā aur dekhtī thiiñ putliyāñ tamāshā ġhaur se

magar na aa.iiñ biin le ke amn vaalī bastiyoñ se jogiyoñ kī Toliyāñ

siyāh āñdhiyoñ kā zor kab talak sahārte

mire charāġh bujh ga.e

mere charagh bujh gae

main tirgi se raushni ki bhik mangta raha

hawaen saz-baz kar rahi thin jin dinon siyah raat se

unhi siyah saaton mein saneha hua

tamam aaine ghubar se be-nur ho gae

sara ke chaar samt haul-nak shab ki KHamushi

chamakti aankh wale bheDiyon ke ghol le ke aa gai

qaba-e-zindagi wo phaD le gae nukile naKHunon se us tarah

ki ruh chithaDon mein baT gai

KHarab mausamon ki chaal thi ki aas-pas banbiyon se

aa gae nikal ke sanp jhumte hue

bujha diya safed raushni ka dil

madad ko main pukarta tha aur dekhti thin putliyan tamasha ghaur se

magar na aain bin le ke amn wali bastiyon se jogiyon ki Toliyan

siyah aandhiyon ka zor kab talak sahaarte

mere charagh bujh gae