mere KHwab

mire ḳhvāb ashkoñ meñ tahlīl ho kar kahīñ kho ga.e haiñ

ḳhayāl aa rahā hai

ki shāyad mirī ruuh ke nīm-tārīk se jangaloñ meñ bhaTakne lage haiñ

ka.ī din se un tak

mirī soch mere tasavvur kī koī rasā.ī nahīñ hai

magar jāntī huuñ ki vo dhīre dhīre mire hī lahū meñ sisakne lage haiñ

ka.ī din se maiñ ne unheñ koī lorī sunā.ī nahīñ hai

so ab ye kisī nanhe bachche kī sūrat bilakne lage haiñ

maiñ ab sochtī huuñ

ki un ke liye

apnī āñkhoñ se bāhar nikalne kī maiñ koī tadbīr kartī

tajraboñ ke raushan safar par unheñ saath le kar to jaatī

maiñ ik baar to un kī tauqīr kartī

maiñ ab sochtī huuñ

ki ik ḳhūbsūrat sā chehra banā kar

unheñ apne kamre kī bosīda dīvār par hī sajātī

mohabbat ke bikhre hue saare rangoñ ko tasvīr kartī

magar ab mire ḳhvāb gahrī baġhāvat ke nashshe meñ haiñ vo bahakne lage haiñ

so ab ye huā hai

ki maiñ ne uThā kar unheñ ghar kī dahlīz par rakh diyā hai

ki shāyad koī ik shanāsā musāfir idhar aan nikle

zarā der Thahre zarā muskurā.e

mire ḳhvāb kī kirchiyoñ ko sameTe

aur apnī umangoñ se bharpūr āñkheñ yahīñ chhoḌ jaa.e

mere KHwab ashkon mein tahlil ho kar kahin kho gae hain

KHayal aa raha hai

ki shayad meri ruh ke nim-tarik se jangalon mein bhaTakne lage hain

kai din se un tak

meri soch mere tasawwur ki koi rasai nahin hai

magar jaanti hun ki wo dhire dhire mere hi lahu mein sisakne lage hain

kai din se main ne unhen koi lori sunai nahin hai

so ab ye kisi nanhe bachche ki surat bilakne lage hain

main ab sochti hun

ki un ke liye

apni aankhon se bahar nikalne ki main koi tadbir karti

tajrabon ke raushan safar par unhen sath le kar to jati

main ek bar to un ki tauqir karti

main ab sochti hun

ki ek KHubsurat sa chehra bana kar

unhen apne kamre ki bosida diwar par hi sajati

mohabbat ke bikhre hue sare rangon ko taswir karti

magar ab mere KHwab gahri baghawat ke nashshe mein hain wo bahakne lage hain

so ab ye hua hai

ki main ne uTha kar unhen ghar ki dahliz par rakh diya hai

ki shayad koi ek shanasa musafir idhar aan nikle

zara der Thahre zara muskurae

mere KHwab ki kirchiyon ko sameTe

aur apni umangon se bharpur aankhen yahin chhoD jae