miTTi ke mausam

badalte hue mausamoñ se mujhe hai shikāyat

ki doharāo kā ye tasalsul bhī

be-rang yaksāniyat ke sivā aur kyā hai

ki miTTī ke mausam

vahī garmiyāñ sardiyāñ

aur ḳhizā.eñ bahāreñ

jo yaksāñ tanāsub se

mujh ko pukāreñ

badalte hue mausamoñ se mirī iltijā hai

agar ho sake to mire ghar ke āñgan meñ

har roz aisī shu'ā'eñ utāreñ

jo pahle kī saarī shu'ā'oñ se hoñ muḳhtalif aur na.ī

merī āñkhoñ meñ bhar deñ na.e rang

jo saat rangoñ kī fehrist meñ bhī na hoñ

raat din kā ye lā-intihā silsila

apne chehre pe

in saat rangoñ kī

be-rang sī ye naqāb oḌh kar

aisī yak-rangī-e-zindagī

mausamoñ ke badalte tanāzur meñ

kab tak chhupā.egā

badalte hue mausamon se mujhe hai shikayat

ki doharao ka ye tasalsul bhi

be-rang yaksaniyat ke siwa aur kya hai

ki miTTi ke mausam

wahi garmiyan sardiyan

aur KHizaen bahaaren

jo yaksan tanasub se

mujh ko pukaren

badalte hue mausamon se meri iltija hai

agar ho sake to mere ghar ke aangan mein

har roz aisi shu'a'en utaren

jo pahle ki sari shu'a'on se hon muKHtalif aur nai

meri aankhon mein bhar den nae rang

jo sat rangon ki fehrist mein bhi na hon

raat din ka ye la-intiha silsila

apne chehre pe

in sat rangon ki

be-rang si ye naqab oDh kar

aisi yak-rangi-e-zindagi

mausamon ke badalte tanazur mein

kab tak chhupaega