mohabbat

ai mohabbat ajiib chiiz hai tū

jān-o-dil se sivā aziiz hai tū

terī betābiyāñ haiñ rashk-e-sukūñ

ġhairat-e-sad-ḳhirad hai terā junūñ

tujh se lazzat hai ashk-bārī meñ

tujh se rāhat hai āh-o-zārī meñ

tere baa.is hai ġham bhī rūh-fazā

tere dam se hai talḳhiyoñ meñ mazā

lazzat-e-soz-o-sāz hai tujh se

jān-o-dil kā gudāz hai tujh se

faiz se tere ashk-e-dīda-e-tar

rū-kash-e-sad-hazār la.al-o-gohar

dil kī nashv-o-numā tire dam se

ruuh kī hai jilā tire dam se

dard meñ tere aisī lazzat hai

jis se sharminda kaif-e-ishrat hai

tujh se ālām meñ shakebā.ī

tujh se ehsās meñ hai ra.anā.ī

zahr kā jaam tujh se āb-e-hayāt

tujh se rangīñ judā.ī ke lamhāt

aag ko tū banātī hai gulzār

tujh se āsāñ hai āzmā.ish-e-dār

tauq-o-zanjīr terā zevar haiñ

tere kāñTe guloñ se behtar haiñ

hai kashish se tirī jahāñ kā nizām

tujh se pā.inda nazm-e-sub.h-o-shām

tū na zarroñ ko gar kare bāham

gir paḌe ye imārat-e-mohkam

dars-e-īsār tū sikhātī hai

nafs kī sar-kashī miTātī hai

tū ġhubār-e-havas ko dhotī hai

dil kī ālūdgī ko khotī hai

aag meñ terī jo bhī jaltā hai

ban ke pāras hī vo nikaltā hai

ai mohabbat ajib chiz hai tu

jaan-o-dil se siwa aziz hai tu

teri betabiyan hain rashk-e-sukun

ghairat-e-sad-KHirad hai tera junun

tujh se lazzat hai ashk-bari mein

tujh se rahat hai aah-o-zari mein

tere bais hai gham bhi ruh-faza

tere dam se hai talKHiyon mein maza

lazzat-e-soz-o-saz hai tujh se

jaan-o-dil ka gudaz hai tujh se

faiz se tere ashk-e-dida-e-tar

ru-kash-e-sad-hazar lal-o-gohar

dil ki nashw-o-numa tere dam se

ruh ki hai jila tere dam se

dard mein tere aisi lazzat hai

jis se sharminda kaif-e-ishrat hai

tujh se aalam mein shakebai

tujh se ehsas mein hai ranai

zahr ka jam tujh se aab-e-hayat

tujh se rangin judai ke lamhat

aag ko tu banati hai gulzar

tujh se aasan hai aazmaish-e-dar

tauq-o-zanjir tera zewar hain

tere kanTe gulon se behtar hain

hai kashish se teri jahan ka nizam

tujh se painda nazm-e-subh-o-sham

tu na zarron ko gar kare baham

gir paDe ye imarat-e-mohkam

dars-e-isar tu sikhati hai

nafs ki sar-kashi miTati hai

tu ghubar-e-hawas ko dhoti hai

dil ki aaludgi ko khoti hai

aag mein teri jo bhi jalta hai

ban ke paras hi wo nikalta hai