mohabbat Diary hargiz nahin hai

mohabbat Diary hargiz nahīñ hai

jis meñ tum likkho

ki kal kis rang ke kapḌe pahanñe kaun sī ḳhushbū lagānī hai

kise kyā baat kahnī kaun sī kis se chhupānī hai

kahāñ kis peḌ ke saa.e tale milnā hai

mil kar pūchhnā hai

kyā tumheñ mujh se mohabbat hai

ye farsūda sā jumla hai

magar phir bhī yahī jumla

darīchoñ āñganoñ saḌkoñ galī kūchoñ meñ chaubāroñ meñ

chaubāroñ kī TuuTī sīḌhiyoñ meñ

har jagah koī kisī se kah rahā hai

kyā tumheñ mujh se mohabbat hai

mohabbat Diary hargiz nahīñ hai

jis meñ tum likkho

tumheñ kis vaqt kis se kis jagah milnā hai kis ko chhoḌ jaanā hai

kahāñ par kis tarah kī guftugū karnī hai yā ḳhāmosh rahnā hai

kisī ke saath kitnī duur tak jaanā hai aur kab lauT aanā hai

kahāñ āñkheñ milānā hai kahāñ palkeñ jhukānā hai

yā ye likkho ki ab kī baar jab vo milne aa.egā

to us kā haath apne haath meñ le kar

dhanak chehre pe raushan jagmagātī raqs kartī us kī āñkhoñ meñ utar jā.eñge

aur phir gulshan-o-sahrā ke bīchoñ-bīch dil kī saltanat meñ ḳhaak uḌā.eñge

bahut mumkin hai vo ujlat meñ aa.e

aur tum us kā haath hāthoñ meñ na le paao

na āñkhoñ hī meñ jhāñko aur na dil kī saltanat ko fat.h kar paao

jahāñ par guftugū karnī hai tum ḳhāmosh ho jaao

jahāñ ḳhāmosh rahnā hai vahāñ tum bolte jaao

na.e kapḌe pahan kar ghar se niklo maile ho jaao

koī ḳhushbū lagāne kā irāda ho to shīshī haath se gir jaa.e

tum vīrān ho jaao

safar karnā se pahle be-sar-o-sāmān ho jaao

mohabbat Diary hargiz nahīñ hai āb-jū hai

jo diloñ ke darmiyāñ bahtī hai ḳhushbū hai

kabhī palkoñ pe lahrā.e to āñkheñ hañsne lagtī haiñ

jo āñkhoñ meñ utar jaa.e to manzar aur pas-e-manzar meñ sham.eñ jalne lagtī haiñ

kisī bhī rang ko chhū le

vahī dil ko gavārā hai

kisī miTTī meñ ghul jaa.e

vahī miTTī sitāra hai

mohabbat Diary hargiz nahin hai

jis mein tum likkho

ki kal kis rang ke kapDe pahanne kaun si KHushbu lagani hai

kise kya baat kahni kaun si kis se chhupani hai

kahan kis peD ke sae tale milna hai

mil kar puchhna hai

kya tumhein mujh se mohabbat hai

ye farsuda sa jumla hai

magar phir bhi yahi jumla

darichon aanganon saDkon gali kuchon mein chaubaron mein

chaubaron ki TuTi siDhiyon mein

har jagah koi kisi se kah raha hai

kya tumhein mujh se mohabbat hai

mohabbat Diary hargiz nahin hai

jis mein tum likkho

tumhein kis waqt kis se kis jagah milna hai kis ko chhoD jaana hai

kahan par kis tarah ki guftugu karni hai ya KHamosh rahna hai

kisi ke sath kitni dur tak jaana hai aur kab lauT aana hai

kahan aankhen milana hai kahan palken jhukana hai

ya ye likkho ki ab ki bar jab wo milne aaega

to us ka hath apne hath mein le kar

dhanak chehre pe raushan jagmagati raqs karti us ki aankhon mein utar jaenge

aur phir gulshan-o-sahra ke bichon-bich dil ki saltanat mein KHak uDaenge

bahut mumkin hai wo ujlat mein aae

aur tum us ka hath hathon mein na le pao

na aankhon hi mein jhanko aur na dil ki saltanat ko fath kar pao

jahan par guftugu karni hai tum KHamosh ho jao

jahan KHamosh rahna hai wahan tum bolte jao

nae kapDe pahan kar ghar se niklo maile ho jao

koi KHushbu lagane ka irada ho to shishi hath se gir jae

tum viran ho jao

safar karna se pahle be-sar-o-saman ho jao

mohabbat Diary hargiz nahin hai aab-ju hai

jo dilon ke darmiyan bahti hai KHushbu hai

kabhi palkon pe lahrae to aankhen hansne lagti hain

jo aankhon mein utar jae to manzar aur pas-e-manzar mein shamen jalne lagti hain

kisi bhi rang ko chhu le

wahi dil ko gawara hai

kisi miTTi mein ghul jae

wahi miTTi sitara hai