mohabbat ki nazm

merī bāteñ jaise dhuup ho sarmā kī dālānoñ meñ

barfeñ terī ḳhāmoshī kī

jin ke nīche haath hamāre mazbūtī se juḌe hue haiñ

saarī bastiyāñ mere tere qayām ko tarseñ

ham mehmān baneñ to un kī būḌhī gaa.eñ

ḳhushk thanoñ se duudh utāreñ

un ke bachche apne baap kā kahnā māneñ

un ke parinde chhatoñ pe baiTh ke par phailā.eñ

ham donoñ ko baḌī-būḌhiyāñ chhoḌne aa.eñ darvāzoñ tak

merī bāteñ jaise sach ho Dare hue bachchoñ kā

terī ḳhāmoshī hai jaise dulhan māiyoñ baiThe

saare raste merī terī chaap ko tarseñ

ham aa.eñ to raste nasheb se uTh kar

ham donoñ ko dekheñ

duur duur tak haath hilā.eñ

ḳhushiyāñ chait ke mausam jaisī

aur jo qasmeñ ham ne khā.īñ

āshiq shahzādoñ ke maqbaroñ jaisī un meñ sachchā.ī hai

jānāñ bārish thakī huī hai

us ko apne bāloñ aur masāmoñ meñ so jaane do

maiñ dhuup kā ik mashrūb

tumhāre vāste

sarmā ke sūraj se māñgtā huuñ

meri baaten jaise dhup ho sarma ki dalanon mein

barfen teri KHamoshi ki

jin ke niche hath hamare mazbuti se juDe hue hain

sari bastiyan mere tere qayam ko tarsen

hum mehman banen to un ki buDhi gaen

KHushk thanon se dudh utaren

un ke bachche apne bap ka kahna manen

un ke parinde chhaton pe baiTh ke par phailaen

hum donon ko baDi-buDhiyan chhoDne aaen darwazon tak

meri baaten jaise sach ho Dare hue bachchon ka

teri KHamoshi hai jaise dulhan maiyon baiThe

sare raste meri teri chap ko tarsen

hum aaen to raste nasheb se uTh kar

hum donon ko dekhen

dur dur tak hath hilaen

KHushiyan chait ke mausam jaisi

aur jo qasmen hum ne khain

aashiq shahzadon ke maqbaron jaisi un mein sachchai hai

jaanan barish thaki hui hai

us ko apne baalon aur masamon mein so jaane do

main dhup ka ek mashrub

tumhaare waste

sarma ke suraj se mangta hun