mohabbat

tumheñ ye kis ne kah diyā āḳhir

ki

kisī restaurant ke niim tārīk goshe meñ

baiTh kar maddham sargoshiyoñ meñ

muskurāte laboñ se baat karnā

aur icecream ke cup meñ chammach hilāte hue

ḳhvāhish-e-dil ko zabāñ par le aanā mohabbat hai

tumheñ ye kis ne kah dayā āḳhir

ki

kisī raqs-kade meñ

ham-raqs ke bāloñ ko chhūte hue dhīre se

dilkash dhunoñ ke hasīñ suroñ par

uThte hue qadmoñ kī taal par

āñkhoñ meñ jhāñknā

sitāroñ ko chun lenā

aur an-kahī sunā denā mohabbat hai

jā.ez-o-nā-jā.ez ke falsafe kā asā thāme

javāz-e-had-o-be-had kī dīvār sajā.e

bilā dastak be-rūh makān-e-jism meñ dar aanā mohabbat hai

mohabbat ko mahz chaar harf na samjho jinheñ tum scrabble meñ isti.māl karte ho

na hī mohabbat koī video game hai

jis meñ gum ho kar tum tension ko bhulāte ho

mohabbat ko wrong number samajh ke milāte ho

mohabbat koī Darā huā parinda nahīñ

jise tum jumloñ kī Dor se bāñdhte ho

muTThī meñ band karte ho aur bhuul jaate ho

balki mohabbat to kisī vahshī qabīle kī chālāk devī

tumhārī anā ko apne tilism meñ yuuñ qaid kartī hai

ki tum saarā zo.am bhuul jaate ho

mohabbat man kā sachchā saudā hai

ise bāzār meñ bechā nahīñ karte

mohabbat ik nāzuk sī laḌkī

jise rulāyā nahīñ karte

mohabbat ko zaa.e.a nahīñ karte

tumhein ye kis ne kah diya aaKHir

ki

kisi restaurant ke nim tarik goshe mein

baiTh kar maddham sargoshiyon mein

muskuraate labon se baat karna

aur icecream ke cup mein chammach hilate hue

KHwahish-e-dil ko zaban par le aana mohabbat hai

tumhein ye kis ne kah daya aaKHir

ki

kisi raqs-kade mein

ham-raqs ke baalon ko chhute hue dhire se

dilkash dhunon ke hasin suron par

uThte hue qadmon ki tal par

aankhon mein jhankna

sitaron ko chun lena

aur an-kahi suna dena mohabbat hai

jaez-o-na-jaez ke falsafe ka asa thame

jawaz-e-had-o-be-had ki diwar sajae

bila dastak be-ruh makan-e-jism mein dar aana mohabbat hai

mohabbat ko mahz chaar harf na samjho jinhen tum scrabble mein istimal karte ho

na hi mohabbat koi wideo game hai

jis mein gum ho kar tum tension ko bhulate ho

mohabbat ko wrong number samajh ke milate ho

mohabbat koi Dara hua parinda nahin

jise tum jumlon ki Dor se bandhte ho

muTThi mein band karte ho aur bhul jate ho

balki mohabbat to kisi wahshi qabile ki chaalak dewi

tumhaari ana ko apne tilism mein yun qaid karti hai

ki tum sara zoam bhul jate ho

mohabbat man ka sachcha sauda hai

ise bazar mein becha nahin karte

mohabbat ek nazuk si laDki

jise rulaya nahin karte

mohabbat ko zaea nahin karte