mohlat

abhī Thahro

abhī se is ta.alluq kā koī unvān mat socho

abhī to is kahānī meñ

mohabbat ke adhūre baab kī takmīl hone tak

nazar kī dhuup meñ rakkhe hue ḳhvāboñ ke

saare zā.iqe tabdīl hone tak

bahut se moḌ aane haiñ

mujhe un se guzarne do

zarā mahsūs karne do

ki mere paañv ke nīche zamīñ ne rañg badlā hai

mire lahje meñ apnā kis tarah āhañg badlā hai

mujhe thoḌā sambhalne do abhī Thahro

abhī Thahro ki vo ḳhush-baḳht saa.at bhī abhī

mujh tak nahīñ pahuñchī

jo dil ke ā.īne ko vahm kī andhī galī se

etibār-e-zāt kī sarhad pe laatī hai

use rasta batātī hai

abhī un rāstoñ par tum mujhe kuchh der chalne do

abhī Thahro

koī ḳhvāhish umīd-o-bīm ke mābain ab bhī

saañs letī hai

use is karb se āzād karne do

vo saare ḳhvāb

jin ko dekhne kā qarz meñ luuTā nahīñ paa.ī

mujhe un ke liye ta.abīr kā saf.ha palaTne do

abhī Thahro

kisī biite hue mausam ke baḳhshe zaḳhm

ab bhī aañkh kī putlī meñ raushan haiñ

zarā ye zaḳhm bharne do

masīhā.ī tumhārī

ruuh kī pātāl tak kaise pahuñchtī hai

mujhe andāza karne do

abhī Thahro

abhī se is ta.alluq kā

koī unvān mat socho

abhi Thahro

abhi se is talluq ka koi unwan mat socho

abhi to is kahani mein

mohabbat ke adhure bab ki takmil hone tak

nazar ki dhup mein rakkhe hue KHwabon ke

sare zaiqe tabdil hone tak

bahut se moD aane hain

mujhe un se guzarne do

zara mahsus karne do

ki mere panw ke niche zamin ne rang badla hai

mere lahje mein apna kis tarah aahang badla hai

mujhe thoDa sambhalne do abhi Thahro

abhi Thahro ki wo KHush-baKHt saat bhi abhi

mujh tak nahin pahunchi

jo dil ke aaine ko wahm ki andhi gali se

etibar-e-zat ki sarhad pe lati hai

use rasta batati hai

abhi un raston par tum mujhe kuchh der chalne do

abhi Thahro

koi KHwahish umid-o-bim ke mabain ab bhi

sans leti hai

use is karb se aazad karne do

wo sare KHwab

jin ko dekhne ka qarz mein luTa nahin pai

mujhe un ke liye tabir ka safha palaTne do

abhi Thahro

kisi bite hue mausam ke baKHshe zaKHm

ab bhi aankh ki putli mein raushan hain

zara ye zaKHm bharne do

masihai tumhaari

ruh ki patal tak kaise pahunchti hai

mujhe andaza karne do

abhi Thahro

abhi se is talluq ka

koi unwan mat socho