mubarak wo saat

maiñ bhaTkā huā ik musāfir

rah-o-rasm-e-manzil se nā-āshnā.ī pe nāzāñ

ta.āqub meñ apnī hī parchhā.iyoñ ke ravāñ thā

mere jism kā bojh dhartī sambhāle hue thī

magar us kī ra.anā.iyoñ se mujhe koī dil-bastagī hī nahīñ thī

kabhī raah chalte hue ḳhaak kī rūh-parvar kashish

maiñ ne mahsūs kī hī nahīñ thī

maiñ āñkhoñ se biinā thā lekin

mere chār-sū chādareñ ā.inoñ kī tarah thiiñ

ki jin ke liye merā partav hī thā ik zinda haqīqat

kisī dūsre ko gavāra na thī is meñ shirkat

maiñ kānoñ se bahrā nahīñ thā

magar jis tarah kohna gumbad meñ chamgādaḌoñ ke bhaTakne kī āvāz gūñjtī nahīñ hai

khule āsmāñ ke parindoñ kī chahkār andar pahuñchtī nahīñ hai

isī tarah merā bhī zauq-e-samā.at rasā thā faqat apnī hī dhaḌkanoñ tak

bas apne lahū kī subuk āhaToñ tak

maiñ bhaTkā huā ik musāfir

merī raah par miT chuke the safar ke ishārāt saare

faramoshiyoñ kī ghanī dhund meñ kho chuke the jihat ke nishānāt saare

rah-e-rasm-e-manzil se maiñ āshnā hī nahīñ thā

magar maiñ akelā

karoḌoñ kī is bhiiḌ meñ bhī udaas aur akelā

ta.āqub meñ apnī hī parchhā.iyoñ ke ravāñ thā

maiñ shāyad hamesha yūñhī apnī parchhā.iyoñ ke ta.āqub meñ hairān phirtā

agar raushnī mujh pe chamkī na hotī

mubārak vo saa.at ki jab maut aur tīrgī ke ghane sā.ebāñ ke tale

raushnī mujh pe chamkī

mere dil pe dhartī ne aur us ke arfa.a mazāhir ne apnī mohabbat raqam kī

mubārak vo saa.at ki jab barq ke koḌe lahrātī

lohe kī chīloñ se aur

ātishīñ tiir barsāte faulād ke par darindoñ se muDbheḌ meñ

maiñ ne dekhe

mere sāthiyoñ ke jigar meñ tarāzū haiñ jo tiir

huā huuñ maiñ ḳhud un kā naḳhchīr

jo qatra lahū kā girā un ke tan se

bahā hai vo mere badan se

mubārak vo saa.at ki jab maiñ ne jaanā

mirī dhaḌkanoñ meñ karoḌoñ diloñ kī sadā hai

merī ruuh meñ mushtarak ''garche qālib judā hai''

main bhaTka hua ek musafir

rah-o-rasm-e-manzil se na-ashnai pe nazan

taaqub mein apni hi parchhaiyon ke rawan tha

mere jism ka bojh dharti sambhaale hue thi

magar us ki ranaiyon se mujhe koi dil-bastagi hi nahin thi

kabhi rah chalte hue KHak ki ruh-parwar kashish

main ne mahsus ki hi nahin thi

main aankhon se bina tha lekin

mere chaar-su chadaren aainon ki tarah thin

ki jin ke liye mera partaw hi tha ek zinda haqiqat

kisi dusre ko gawara na thi is mein shirkat

main kanon se bahra nahin tha

magar jis tarah kohna gumbad mein chamgadaDon ke bhaTakne ki aawaz gunjti nahin hai

khule aasman ke parindon ki chahkar andar pahunchti nahin hai

isi tarah mera bhi zauq-e-samaat rasa tha faqat apni hi dhaDkanon tak

bas apne lahu ki subuk aahaTon tak

main bhaTka hua ek musafir

meri rah par miT chuke the safar ke ishaaraat sare

faramoshiyon ki ghani dhund mein kho chuke the jihat ke nishanat sare

rah-e-rasm-e-manzil se main aashna hi nahin tha

magar main akela

karoDon ki is bhiD mein bhi udas aur akela

taaqub mein apni hi parchhaiyon ke rawan tha

main shayad hamesha yunhi apni parchhaiyon ke taaqub mein hairan phirta

agar raushni mujh pe chamki na hoti

mubarak wo saat ki jab maut aur tirgi ke ghane saeban ke tale

raushni mujh pe chamki

mere dil pe dharti ne aur us ke arfa mazahir ne apni mohabbat raqam ki

mubarak wo saat ki jab barq ke koDe lahraati

lohe ki chilon se aur

aatishin tir barsate faulad ke par darindon se muDbheD mein

main ne dekhe

mere sathiyon ke jigar mein taraazu hain jo tir

hua hun main KHud un ka naKHchir

jo qatra lahu ka gira un ke tan se

baha hai wo mere badan se

mubarak wo saat ki jab main ne jaana

meri dhaDkanon mein karoDon dilon ki sada hai

meri ruh mein mushtarak garche qalib juda hai