mudawa

kitne bebāk haiñ shā.ir ab ke

kitne uryāñ haiñ ye afsāna-nigār

kuchh samajh meñ mire aate hī nahīñ

in adab-sozoñ ke gunjalak-ash.ār

yuuñ to apne ko ye kahte haiñ adiib

paḌhte haiñ jañg ke lekin aḳhbār

kabhī europe kā kabhī pūrab kā

zikr karne meñ uḌāte haiñ sharār

dāstāneñ na qasīde na ġhazal

adab-e-talḳh kī har sū bhar maar

kabhī punjab kī bhoñDī bāteñ

kabhī bañgāl ke gande afkār

ḳhūn-ālūda haiñ un kī nasreñ

piip bahte hue in ke ash.ār

un ke afsānoñ ke mauzū ajiib

kaalī laḌkī kabhī kaalī shalvār

ann-dātā se kabhī laḌ baiThe

kabhī aflās pe khīñchtī talvār

un kī nazmoñ meñ koī lutf nahīñ

na koī naġhma na tafsīr-e-bahār

kabhī āvāra kabhī ḳhāna-ba-dosh

kabhī aurat kabhī mīnā-bāzār

bad-mazāqī kī sarāsar bāteñ

rañg o bū chhoḌ ke āñdhī kī pukār

harf-e-āḳhir kī vo shamshīr do-dam

zahr meñ Duubī huī jis kī dhaar

jañg-e-āzādī kā sar meñ saudā

besvā ke liye itne īsār

aib-poshī unheñ aatī hī nahīñ

zaḳhm dhote haiñ sar-e-rāh-guzār

ek maiñ bhī to huuñ pakkā shā.ir

magar in bātoñ se bilkul inkār

sanad-e-māzī se pur merā kalām

fikr-e-imroz se kartā huuñ farār

hotā hai saaf mirā har misrā

ek bhī sher nahīñ zehn pe baar

lekin us ke liye ab kyā maiñ karūñ

ye samajhte nahīñ mujh ko fankār

inqilāb aur adab-hā-e-ġhazab

kitne maḳhdūsh haiñ ye sab āsār

gaurkī jābir o nazr-ul-islām

yahī do chaar haiñ in ke meyār

sunñe meñ aayā hai bahre mire kaan

ki ḳhudā se bhī unheñ hai inkār

maz.haboñ se unheñ behad nafrat

mābadoñ par ye uḌāte haiñ ġhubār

hukmarānoñ kā koī ḳhauf nahīñ

umrā kā nahīñ kuchh dil meñ vaqār

chāñd par ḳhaak uḌāne ke liye

jab bhī dekhā unheñ paayā tayyār

muḳhtasar ye ki har ik fel un kā

shola-dar-qasr shikan-dar-dīvar

maiñ to aajiz huuñ ilāhī tauba

āḳhir aa.egā kabhī un ko qarār

koī lillāh haTāo un ko

jaag uTThe haiñ sulāo un ko

kitne bebak hain shair ab ke

kitne uryan hain ye afsana-nigar

kuchh samajh mein mere aate hi nahin

in adab-sozon ke gunjalak-ashaar

yun to apne ko ye kahte hain adib

paDhte hain jang ke lekin aKHbar

kabhi europe ka kabhi purab ka

zikr karne mein uDate hain sharar

dastanen na qaside na ghazal

adab-e-talKH ki har su bhar mar

kabhi punjab ki bhonDi baaten

kabhi bangal ke gande afkar

KHun-aluda hain un ki nasren

pip bahte hue in ke ashaar

un ke afsanon ke mauzu ajib

kali laDki kabhi kali shalwar

ann-data se kabhi laD baiThe

kabhi aflas pe khinchti talwar

un ki nazmon mein koi lutf nahin

na koi naghma na tafsir-e-bahaar

kabhi aawara kabhi KHana-ba-dosh

kabhi aurat kabhi mina-bazar

bad-mazaqi ki sarasar baaten

rang o bu chhoD ke aandhi ki pukar

harf-e-aKHir ki wo shamshir do-dam

zahr mein Dubi hui jis ki dhaar

jang-e-azadi ka sar mein sauda

beswa ke liye itne isar

aib-poshi unhen aati hi nahin

zaKHm dhote hain sar-e-rah-guzar

ek main bhi to hun pakka shair

magar in baaton se bilkul inkar

sanad-e-mazi se pur mera kalam

fikr-e-imroz se karta hun farar

hota hai saf mera har misra

ek bhi sher nahin zehn pe bar

lekin us ke liye ab kya main karun

ye samajhte nahin mujh ko fankar

inqilab aur adab-ha-e-ghazab

kitne maKHdush hain ye sab aasar

gaurki jabir o nazr-ul-islam

yahi do chaar hain in ke meyar

sunne mein aaya hai bahre mere kan

ki KHuda se bhi unhen hai inkar

mazhabon se unhen behad nafrat

mabadon par ye uDate hain ghubar

hukmaranon ka koi KHauf nahin

umra ka nahin kuchh dil mein waqar

chand par KHak uDane ke liye

jab bhi dekha unhen paya tayyar

muKHtasar ye ki har ek fel un ka

shola-dar-qasr shikan-dar-diwar

main to aajiz hun ilahi tauba

aaKHir aaega kabhi un ko qarar

koi lillah haTao un ko

jag uTThe hain sulao un ko