muflisi

MORE BYNazeer Akbarabadi

    jab aadmī ke haal pe aatī hai muflisī

    kis kis tarah se us ko satātī hai muflisī

    pyāsā tamām roz biThātī hai muflisī

    bhūkā tamām raat sulātī hai muflisī

    ye dukh vo jaane jis pe ki aatī hai muflisī

    kahiye to ab hakīm sab se baḌī hai shaañ

    ta.azīm jis karte haiñ to ab aur ḳhaañ

    muflis hue to hazrat-e-luqmāñ kiyā hai yaañ

    iisā bhī ho to koī nahīñ pūchhtā miyāñ

    hikmat hakīm bhī Dubātī hai muflisī

    jo ahl-e-fazl aalim o fāzil kahāte haiñ

    muflis hue to kalma talak bhuul jaate haiñ

    vo jo ġharīb-ġhurabā ke laḌke paḌhāte haiñ

    un to umr bhar nahīñ jaatī hai muflisī

    muflis kare jo aan ke mahfil ke biich haal

    sab jāneñ roTiyoñ ye Daalā hai is ne jaal

    gir gir paḌe to koī na liye use sambhāl

    muflis meñ hoveñ laakh agar ilm aur kamāl

    sab ḳhaak bech aa ke milātī hai muflisī

    jab roTiyoñ ke baTne aa kar paḌe shumār

    muflis ko deveñ ek tavañgar ko chaar chaar

    gar aur māñge vo to use jhiḌkeñ baar baar

    muflis haal aah bayāñ kyā karūñ maiñ yaar

    muflis ko is jagah bhī chabātī hai muflisī

    muflis kuchh nazar nahīñ rahtī hai aan par

    detā hai apnī jaan vo ek ek naan par

    har aan TuuT paḌtā hai roTī ke ḳhvān par

    jis tarah kutte laḌte haiñ ik ustuḳhvān par

    vaisā muflisoñ ko laḌātī hai muflisī

    kartā nahīñ hayā se jo koī vo kaam aah

    muflis kare hai us ke ta.iiñ insirām aah

    samjhe na kuchh halāl na jaane harām aah

    kahte haiñ jis ko sharm-o-hayā nañg-o-nām aah

    vo sab hayā-o-sharm uḌātī hai muflisī

    ye muflisī vo shai hai ki jis ghar meñ bhar ga.ī

    phir jitne ghar the sab meñ usī ghar ke dar ga.ī

    zan bachche rote haiñ goyā naanī guzar ga.ī

    ham-sāya pūchhte haiñ ki kyā daadī mar ga.ī

    bin murde ghar meñ shor machātī hai muflisī

    lāzim hai gar ġhamī meñ koī shor-ġhul machā.e

    muflis baġhair ġham ke kartā hai haa.e haa.e

    mar jaave gar koī to kahāñ se use uThā.e

    is muflisī ḳhvāriyāñ kyā kyā kahūñ maiñ haa.e

    murde ko be kafan ke gaḌātī hai muflisī

    kyā kyā muflisī kahūñ ḳhvārī phakaḌiyāñ

    jhāḌū baġhair ghar meñ bikhartī haiñ jhakaḌiyāñ

    kone meñ jaale lapTe haiñ chhappar meñ makaḌiyāñ

    paisā na hove jin ke jalāne ko lakḌiyāñ

    dariyā meñ un ke murde bahātī hai muflisī

    biibī nath na laḌkoñ ke hāthoñ kaḌe rahe

    kapḌe miyāñ ke baniye ke ghar meñ paḌe rahe

    jab kaḌiyāñ bik ga.iiñ to khañDar meñ paḌe rahe

    zanjīr ne kivāḌ na patthar gaḌe rahe

    āḳhir ko iiñT iiñT khudātī hai muflisī

    naqqāsh par bhī zor jab aa muflisī kare

    sab rañg dam meñ kar de musavvir ke kirkire

    sūrat bhī us dekh ke muñh khiñch rahe pare

    tasvīr aur naqsh meñ kyā rañg vo bhare

    us ke to muñh rañg uḌātī hai muflisī

    jab ḳhūb-rū pe aan ke paḌtā hai din siyāh

    phirtā hai bose detā hai har ik ko ḳhvāh-maḳhvāh

    hargiz kisī ke dil ko nahīñ hotī us chaah

    gar husn ho hazār ruupe to us ko aah

    kyā kauḌiyoñ ke mol bikātī hai muflisī

    us ḳhūb-rū ko kaun de ab daam aur diram

    jo kauḌī kauḌī bose ko raazī ho dam-ba-dam

    Topī purānī do to vo jaane kulāh-e-jism

    kyūñkar na ko us chaman-e-husn ke ho ġham

    jis bahār muft luTātī hai muflisī

    āshiq ke haal par bhī jab aa muflisī paḌe

    ma.ashūq apne paas na de us ko baiThne

    aave jo raat ko to nikāle vahīñ use

    is Dar se ya.anī raat o dhannā kahīñ na de

    tohmat ye āshiqoñ ko lagātī hai muflisī

    kaise dhūm-dhām ranDī ho ḳhush-jamāl

    jab muflisī ho kaan paḌe sar pe us ke jaal

    dete haiñ us ke naach ko ThaTThe ke biich Daal

    nāche hai vo to farsh ke uupar qadam sambhāl

    aur us ko uñgliyoñ pe nachātī hai muflisī

    us to dil Thikāne nahīñ bhaav kyā batā.e

    jab ho phaTā dupaTTa to kaahe se muñh chhupā.e

    le shaam se vo sub.h talak go ki nāche gaa.e

    auroñ ko aaTh saat to vo do Take paa.e

    is laaj se ise bhī lajātī hai muflisī

    jis kasbī ranDī ho halākat se dil hazīñ

    rakhtā hai us ko jab koī aa kar tamāsh-bīñ

    ik paun paise tak bhī vo kartī nahīñ nahīñ

    ye dukh usī se pūchhiye ab aah jis ke ta.iiñ

    sohbat meñ saarī raat jagātī hai muflisī

    vo to ye samjhe dil meñ ki Dhelā jo pā.ūñgī

    damḌī ke paan damḌī ke missī mañgā.ūñgī

    baaqī rahī chhadām so paanī bharā.ūñgī

    phir dil meñ sochtī hai ki kyā ḳhaak khā.ūñgī

    āḳhir chabīnā us bhunātī hai muflisī

    jab muflisī se hove kalāvant dil udaas

    phirtā hai le tambūre ko har ghar ke ās-pās

    ik paav ser aane dil meñ lagā ke aas

    gorī vaqt hove to gaatā hai vo babhās

    yaañ tak havās us ke uḌātī hai muflisī

    muflis biyāh beTī kartā hai bol bol

    paisā kahāñ jo ke vo laave jahez mol

    jorū vo galā ki phūTā ho jaise Dhol

    ghar halāl-ḳhorī talak kartī hai ThiThol

    haibat tamām us uThātī hai muflisī

    beTe biyāh ho to na byāhī na sāthī hai

    ne raushnī na baaje āvāz aatī hai

    maañ pīchhe ek mailī chadar oḌhe jaatī hai

    beTā banā hai dūlhā to baavā barātī hai

    muflis ye barāt chaḌhātī hai muflisī

    gar byaah kar chalā hai sahar ko to ye balā

    shahdār naanā hījḌā aur bhaaT muñDchaḌā

    khīñche hue use chale jaate haiñ jā-ba-jā

    vo aage aage laḌtā huā jaatā hai chalā

    aur pīchhe TapḌiyoñ ko bajātī hai muflisī

    darvāze par zanāne bajāte haiñ tāliyāñ

    aur ghar meñ baiThī Domnī detī haiñ gāliyāñ

    mālan gale haar ho dauḌī le Dāliyāñ

    saqqā khaḌā sunātā hai bāteñ razāliyāñ

    ye ḳhvārī ye ḳharābī dikhātī hai muflisī

    koī shuum be-hayā koī bolā nikhaTTū hai

    beTī ne jaanā baap to merā nikhaTTū hai

    beTe pukārte haiñ ki baabā nikhaTTū hai

    biibī ye dil maiñ kahtī hai achchhā nikhaTTū hai

    āḳhir nikhaTTū naam dharātī hai muflisī

    muflis dard dil meñ koī Thāntā nahīñ

    muflis baat ko bhī koī māntā nahīñ

    zaat aur hasab-nasab ko koī jāntā nahīñ

    sūrat bhī us phir koī pahchāntā nahīñ

    yaañ tak nazar se us ko girātī hai muflisī

    jis vaqt muflisī se ye aa kar huā tabāh

    phir koī is ke haal pa kartā nahīñ nigāh

    dālīdarī kahe koī Thahrā de rū-siyāh

    jo bāteñ umr bhar na sunī hoveñ us ne aah

    vo bāteñ us ko aa ke sunātī haiñ muflisī

    chūlhā tavānā paanī ke maTke meñ aabī hai

    piine ko kuchh na khāne ko aur ne rakābī hai

    muflis ke saath sab ke ta.iiñ be-hijābī hai

    muflis jorū sach hai ki yaañ sab bhābī hai

    izzat sab us ke dil gañvātī hai muflisī

    kaisā aadmī ho par iflās ke tufail

    koī gadhā kahe use Thahrā de koī bail

    kapḌe phaTe tamām baḌhe baal phail phail

    muñh ḳhushk daañt zard badan par jamā hai mail

    sab shakl qaidiyoñ banātī hai muflisī

    har aan dostoñ mohabbat ghaTātī hai

    jo āshnā haiñ un to ulfat ghaTātī hai

    apne mehr ġhair chāhat ghaTātī hai

    sharm-o-hayā o izzat-o-hurmat ghaTātī hai

    haañ nāḳhun aur baal baḌhātī hai muflisī

    jab muflisī huī to sharāfat kahāñ rahī

    vo qadr zaat vo najābat kahāñ rahī

    kapḌe phaTe to logoñ meñ izzat kahāñ rahī

    ta.azīm aur tavāzo.a bābat kahāñ rahī

    majlis jūtiyoñ pe biThātī hai muflisī

    muflis kisī laḌkā jo le pyaar se uThā

    baap us dekhe haath aur paañv kaḌā

    kahtā hai koī juutī na leve kahīñ churā

    naT-khaT uchakkā chor daġhābāz gaTh-kaTā

    sau sau tarah ke aib lagātī hai muflisī

    rakhtī nahīñ kisī ye ġhairat aan ko

    sab ḳhaak meñ milātī hai hurmat shaan ko

    sau mehnatoñ meñ us khapātī hai jaan ko

    chorī pe aa ke Daale muflis ke dhyān ko

    āḳhir nadān bhiik mañgātī hai muflisī

    duniyā meñ le ke shaah se ai yaar tā-faqīr

    ḳhāliq na muflisī meñ kisī ko kare asiir

    ashrāf ko banātī hai ik aan meñ faqīr

    kyā kyā maiñ muflisī ḳharābī kahūñ 'nazīr'

    vo jaane jis ke dil ko jalātī hai muflisī

    jab aadmi ke haal pe aati hai muflisi

    kis kis tarah se us ko satati hai muflisi

    pyasa tamam roz biThati hai muflisi

    bhuka tamam raat sulati hai muflisi

    ye dukh wo jaane jis pe ki aati hai muflisi

    kahiye to ab hakim ki sab se baDi hai shan

    tazim jis ki karte hain to ab aur KHan

    muflis hue to hazrat-e-luqman kiya hai yan

    isa bhi ho to koi nahin puchhta miyan

    hikmat hakim ki bhi Dubaati hai muflisi

    jo ahl-e-fazl aalim o fazil kahate hain

    muflis hue to kalma talak bhul jate hain

    wo jo gharib-ghuraba ke laDke paDhate hain

    un ki to umr bhar nahin jati hai muflisi

    muflis kare jo aan ke mahfil ke bich haal

    sab jaanen roTiyon ka ye Dala hai is ne jal

    gir gir paDe to koi na liye use sambhaal

    muflis mein howen lakh agar ilm aur kamal

    sab KHak bech aa ke milati hai muflisi

    jab roTiyon ke baTne ka aa kar paDe shumar

    muflis ko dewen ek tawangar ko chaar chaar

    gar aur mange wo to use jhiDken bar bar

    muflis ka haal aah bayan kya karun main yar

    muflis ko is jagah bhi chabaati hai muflisi

    muflis ki kuchh nazar nahin rahti hai aan par

    deta hai apni jaan wo ek ek nan par

    har aan TuT paDta hai roTi ke KHwan par

    jis tarah kutte laDte hain ek ustuKHwan par

    waisa hi muflison ko laDati hai muflisi

    karta nahin haya se jo koi wo kaam aah

    muflis kare hai us ke tain insiram aah

    samjhe na kuchh halal na jaane haram aah

    kahte hain jis ko sharm-o-haya nang-o-nam aah

    wo sab haya-o-sharm uDati hai muflisi

    ye muflisi wo shai hai ki jis ghar mein bhar gai

    phir jitne ghar the sab mein usi ghar ke dar gai

    zan bachche rote hain goya nani guzar gai

    ham-saya puchhte hain ki kya dadi mar gai

    bin murde ghar mein shor machati hai muflisi

    lazim hai gar ghami mein koi shor-ghul machae

    muflis baghair gham ke hi karta hai hae hae

    mar jawe gar koi to kahan se use uThae

    is muflisi ki KHwariyan kya kya kahun main hae

    murde ko be kafan ke gaDati hai muflisi

    kya kya muflisi ki kahun KHwari phakaDiyan

    jhaDu baghair ghar mein bikharti hain jhakaDiyan

    kone mein jale lapTe hain chhappar mein makaDiyan

    paisa na howe jin ke jalane ko lakDiyan

    dariya mein un ke murde bahati hai muflisi

    bibi ki nath na laDkon ke hathon kaDe rahe

    kapDe miyan ke baniye ke ghar mein paDe rahe

    jab kaDiyan bik gain to khanDar mein paDe rahe

    zanjir ne kiwaD na patthar gaDe rahe

    aaKHir ko inT inT khudati hai muflisi

    naqqash par bhi zor jab aa muflisi kare

    sab rang dam mein kar de musawwir ke kirkire

    surat bhi us ki dekh ke munh khinch rahe pare

    taswir aur naqsh mein kya rang wo bhare

    us ke to munh ka rang uDati hai muflisi

    jab KHub-ru pe aan ke paDta hai din siyah

    phirta hai bose deta hai har ek ko KHwah-maKHwah

    hargiz kisi ke dil ko nahin hoti us ki chah

    gar husn ho hazar rupe ka to us ko aah

    kya kauDiyon ke mol bikati hai muflisi

    us KHub-ru ko kaun de ab dam aur diram

    jo kauDi kauDi bose ko raazi ho dam-ba-dam

    Topi purani do to wo jaane kulah-e-jism

    kyunkar na ji ko us chaman-e-husn ke ho gham

    jis ki bahaar muft luTati hai muflisi

    aashiq ke haal par bhi jab aa muflisi paDe

    mashuq apne pas na de us ko baiThne

    aawe jo raat ko to nikale wahin use

    is Dar se yani raat o dhanna kahin na de

    tohmat ye aashiqon ko lagati hai muflisi

    kaise hi dhum-dham ki ranDi ho KHush-jamal

    jab muflisi ho kan paDe sar pe us ke jal

    dete hain us ke nach ko ThaTThe ke bich Dal

    nache hai wo to farsh ke upar qadam sambhaal

    aur us ko ungliyon pe nachati hai muflisi

    us ka to dil Thikane nahin bhaw kya batae

    jab ho phaTa dupaTTa to kahe se munh chhupae

    le sham se wo subh talak go ki nache gae

    auron ko aaTh sat to wo do Take hi pae

    is laj se ise bhi lajati hai muflisi

    jis kasbi ranDi ka ho halakat se dil hazin

    rakhta hai us ko jab koi aa kar tamash-bin

    ek paun paise tak bhi wo karti nahin nahin

    ye dukh usi se puchhiye ab aah jis ke tain

    sohbat mein sari raat jagati hai muflisi

    wo to ye samjhe dil mein ki Dhela jo paungi

    damDi ke pan damDi ke missi mangaungi

    baqi rahi chhadam so pani bharaungi

    phir dil mein sochti hai ki kya KHak khaungi

    aaKHir chabina us ka bhunati hai muflisi

    jab muflisi se howe kalawant ka dil udas

    phirta hai le tambure ko har ghar ke aas-pas

    ek paw ser aane ki dil mein laga ke aas

    gori ka waqt howe to gata hai wo babhas

    yan tak hawas us ke uDati hai muflisi

    muflis biyah beTi ka karta hai bol bol

    paisa kahan jo ja ke wo lawe jahez mol

    joru ka wo gala ki phuTa ho jaise Dhol

    ghar ki halal-KHori talak karti hai ThiThol

    haibat tamam us ki uThati hai muflisi

    beTe ka biyah ho to na byahi na sathi hai

    ne raushni na baje ki aawaz aati hai

    man pichhe ek maili chadar oDhe jati hai

    beTa bana hai dulha to bawa baraati hai

    muflis ki ye baraat chaDhati hai muflisi

    gar byah kar chala hai sahar ko to ye bala

    shahdar nana hijDa aur bhaT munDchaDa

    khinche hue use chale jate hain ja-ba-ja

    wo aage aage laDta hua jata hai chala

    aur pichhe TapDiyon ko bajati hai muflisi

    darwaze par zanane bajate hain taliyan

    aur ghar mein baiThi Domni deti hain galiyan

    malan gale ki haar ho dauDi le Daliyan

    saqqa khaDa sunata hai baaten razaliyan

    ye KHwari ye KHarabi dikhati hai muflisi

    koi shum be-haya koi bola nikhaTTu hai

    beTi ne jaana bap to mera nikhaTTu hai

    beTe pukarte hain ki baba nikhaTTu hai

    bibi ye dil main kahti hai achchha nikhaTTu hai

    aaKHir nikhaTTu nam dharaati hai muflisi

    muflis ka dard dil mein koi Thanta nahin

    muflis ki baat ko bhi koi manta nahin

    zat aur hasab-nasab ko koi jaanta nahin

    surat bhi us ki phir koi pahchanta nahin

    yan tak nazar se us ko giraati hai muflisi

    jis waqt muflisi se ye aa kar hua tabah

    phir koi is ke haal pa karta nahin nigah

    dalidari kahe koi Thahra de ru-siyah

    jo baaten umr bhar na suni howen us ne aah

    wo baaten us ko aa ke sunati hain muflisi

    chulha tawana pani ke maTke mein aabi hai

    pine ko kuchh na khane ko aur ne rakabi hai

    muflis ke sath sab ke tain be-hijabi hai

    muflis ki joru sach hai ki yan sab ki bhabi hai

    izzat sab us ke dil ki ganwati hai muflisi

    kaisa hi aadmi ho par iflas ke tufail

    koi gadha kahe use Thahra de koi bail

    kapDe phaTe tamam baDhe baal phail phail

    munh KHushk dant zard badan par jama hai mail

    sab shakl qaidiyon ki banati hai muflisi

    har aan doston ki mohabbat ghaTati hai

    jo aashna hain un ki to ulfat ghaTati hai

    apne ki mehr ghair ki chahat ghaTati hai

    sharm-o-haya o izzat-o-hurmat ghaTati hai

    han naKHun aur baal baDhati hai muflisi

    jab muflisi hui to sharafat kahan rahi

    wo qadr zat ki wo najabat kahan rahi

    kapDe phaTe to logon mein izzat kahan rahi

    tazim aur tawazoa ki babat kahan rahi

    majlis ki jutiyon pe biThati hai muflisi

    muflis kisi ka laDka jo le pyar se uTha

    bap us ka dekhe hath ka aur panw ka kaDa

    kahta hai koi juti na lewe kahin chura

    naT-khaT uchakka chor daghabaz gaTh-kaTa

    sau sau tarah ke aib lagati hai muflisi

    rakhti nahin kisi ki ye ghairat ki aan ko

    sab KHak mein milati hai hurmat ki shan ko

    sau mehnaton mein us ki khapati hai jaan ko

    chori pe aa ke Dale hi muflis ke dhyan ko

    aaKHir nadan bhik mangati hai muflisi

    duniya mein le ke shah se ai yar ta-faqir

    KHaliq na muflisi mein kisi ko kare asir

    ashraf ko banati hai ek aan mein faqir

    kya kya main muflisi ki KHarabi kahun 'nazir'

    wo jaane jis ke dil ko jalati hai muflisi

    Tagged Under

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY