mujh sa mabhut aashiq

kaisī maḳhlūq thī

aag meñ us kā ghar thā

alaav kī hiddat meñ

mavvāj lahroñ ko

apne badan kī malāhat meñ

mahsūs kartī thī

lekin vo andar se

apne hī paanī se Dartī thī

kitne hī ushshāq

apnī javānī meñ

paanī meñ

ik sāniya

us ko chhūne kī ḳhvāhish meñ

nīche umuq meñ bahut nīche utre

magar phir na ubhre

samundar ne manthan se

un ke vajūdoñ ko zam kar liyā

dūdhiyā jhaag ne

aur kohna namak ne

unheñ apnī tezābiyat meñ ghulāyā

bhaḌaktī huī aag ne

jazr-o-mad meñ lapeTā unheñ

sar se pā tak jalāyā

magar koī sho.aloñ se kundan sā

sīpoñ se motī sā

bāhar na aayā

vo ab bhī samundar meñ

iThlātī sat.hoñ ke niile bahāv meñ

apne alaav meñ

qasr-e-zamurrad meñ tanhā bhaTaktī hai

ik bā-ahā āb-o-ātish meñ

rañgoñ kī bārish meñ

ab bhī vo zulfeñ jhaTaktī hai

to ūd-o-ambar kī mahkār aatī hai

qatrāt uḌ kar

dahan kitne ghoñgoñ kā bharte haiñ

us kī jhalak dekhne ke liye

aaj bhī log marte haiñ

ab bhī yahāñ kashtiyoñ āb-dozoñ

jahāzoñ ke arshoñ pe

us kī hī bāteñ haiñ

duniyā ke sayyāh

sātoñ samundar ke mallāh

us ke na hone pe

hone pe takrār karte haiñ

us kī kashish meñ

bahut duur ke pāniyoñ meñ

safar ke liye

ḳhud ko tayār karte haiñ

maiñ bhī yahāñ

muztarib aur behāl

ḳhasta-o-pārīna taḳhte pe bahtā huā

ek ḳhufta jazīre ke nazdīk

kyā dekhtā huuñ

ki vo ek patthar pe baiThī hai

paanī pe taarī hai

ik kaif sā

chāñdnī kī lapak

aur havā kī madhur lai pe

machhlī sā nīche kā dhaḌ us kā

shaffāf paanī meñ hiltā hai

abreshmīñ nuur meñ

aks-e-sīmāb sā

us ke galnā chehre pe khiltā hai

ab dekhiye

mujh sā mab.hūt āshiq

use apnī āġhosh meñ kaise bhartā hai

ġharqāb hotā hai

martā hai

kaisi maKHluq thi

aag mein us ka ghar tha

alaw ki hiddat mein

mawwaj lahron ko

apne badan ki malahat mein

mahsus karti thi

lekin wo andar se

apne hi pani se Darti thi

kitne hi ushshaq

apni jawani mein

pani mein

ek saniya

us ko chhune ki KHwahish mein

niche umuq mein bahut niche utre

magar phir na ubhre

samundar ne manthan se

un ke wajudon ko zam kar liya

dudhiya jhag ne

aur kohna namak ne

unhen apni tezabiyat mein ghulaya

bhaDakti hui aag ne

jazr-o-mad mein lapeTa unhen

sar se pa tak jalaya

magar koi shoalon se kundan sa

sipon se moti sa

bahar na aaya

wo ab bhi samundar mein

iThlati sathon ke nile bahaw mein

apne alaw mein

qasr-e-zamurrad mein tanha bhaTakti hai

ek ba-aha aab-o-atish mein

rangon ki barish mein

ab bhi wo zulfen jhaTakti hai

to ud-o-ambar ki mahkar aati hai

qatraat uD kar

dahan kitne ghongon ka bharte hain

us ki jhalak dekhne ke liye

aaj bhi log marte hain

ab bhi yahan kashtiyon aab-dozon

jahazon ke arshon pe

us ki hi baaten hain

duniya ke sayyah

saton samundar ke mallah

us ke na hone pe

hone pe takrar karte hain

us ki kashish mein

bahut dur ke paniyon mein

safar ke liye

KHud ko tayar karte hain

main bhi yahan

muztarib aur behaal

KHasta-o-parina taKHte pe bahta hua

ek KHufta jazire ke nazdik

kya dekhta hun

ki wo ek patthar pe baiThi hai

pani pe tari hai

ek kaif sa

chandni ki lapak

aur hawa ki madhur lai pe

machhli sa niche ka dhaD us ka

shaffaf pani mein hilta hai

abreshmin nur mein

aks-e-simab sa

us ke galna chehre pe khilta hai

ab dekhiye

mujh sa mabhut aashiq

use apni aaghosh mein kaise bharta hai

gharqab hota hai

marta hai