mujhe abhi bahut dur jaana hai

kyā pairoñ kī thakan is safar ko rok saktī hai

kyā rāste ke roḌe mere irāde ko toḌ sakte haiñ

kyā maiñ yahāñ se vāpas lauT jā.ūñgā

kyā maiñ aur aage chal nahīñ pā.ūñgā

nahīñ nahīñ

shāyad mujhe jaanā hai bahut duur

go huuñ maiñ thakan se chuur

aur be-zār har manzar se

jo baar baar lauT kar nazar kī uktāhaT ban jaatā hai

vahī āsmān

vahī zamīn

vahī chāñd vahī sitāre

chāñdnī meñ chamakte aur mahakte vahī phuul

hāthoñ meñ chubhte vahī babūl

vahī mere man ko salāḳhoñ meñ lahū karne vaale aqvāl

lekin shāyad uktāhaT bhī maane na ho

qadmoñ kī

shāyad zindagī qaidī na bane lamhoñ kī

ye to havā-e-barg-o-bār kī tarah hai

jo kabhī na kabhī guzar jā.egī

mere zehn ke ḳhazāne kī uuprī sat.h ko bhī

kabhī na chhū pā.egī

shāyad abhī aage bahut duur jaanā hai

aur in baar baar aate lamhoñ

har baar aañkh ke sāmne ubharte manzaroñ

dariyāoñ sahrāoñ jañgaloñ

gaañv aur shahroñ

ke bhiiḌ se mujhe koī nayā rañg

nikālnā hogā

apne parāganda zehn ko qabr meñ dafn kar ke

nayā but nayā mandir banānā hogā

purāne lafzoñ se nayā lafz

purāne ma.ānī se na.e ma.ānī

ḳhalq karne hoñge

yahī nahīñ

mujhe pārīna kānoñ meñ

samā.atoñ ke na.e paimāne

āñkhoñ ke liye

na.e manzar-nāme se tartīb dene hoñge

chalte chalte mere juute bhī ghis ga.e haiñ

mujhe uff jūtoñ ko hī badalnā hogā

aur āñkhoñ par na.ī ainak lagānī hogī

taaki purāne shīshe meñ na.e rañg

purāne na dikhā.ī deñ

shāyad ye thakan mujhe rok na paa.e

shāyad maiñ in roadoñ ko phalāñg duuñ

shāyad apne hāthoñ se babūloñ ko noch

pheñkūñ

shāyad maiñ sin kī salāḳhoñ ko toḌ kar

bāhar aa jā.ūñ

aur malgajī chāñdnī ke aks ghar

apne lahū se surḳh-rū kar duuñ

aur qadam baḌhāte aage nigal jā.ūñ

shāyad mujhe abhī bahut duur jaanā hai

kya pairon ki thakan is safar ko rok sakti hai

kya raste ke roDe mere irade ko toD sakte hain

kya main yahan se wapas lauT jaunga

kya main aur aage chal nahin paunga

nahin nahin

shayad mujhe jaana hai bahut dur

go hun main thakan se chur

aur be-zar har manzar se

jo bar bar lauT kar nazar ki uktahaT ban jata hai

wahi aasman

wahi zamin

wahi chand wahi sitare

chandni mein chamakte aur mahakte wahi phul

hathon mein chubhte wahi babul

wahi mere man ko salaKHon mein lahu karne wale aqwal

lekin shayad uktahaT bhi mane na ho

qadmon ki

shayad zindagi qaidi na bane lamhon ki

ye to hawa-e-barg-o-bar ki tarah hai

jo kabhi na kabhi guzar jaegi

mere zehn ke KHazane ki upri sath ko bhi

kabhi na chhu paegi

shayad abhi aage bahut dur jaana hai

aur in bar bar aate lamhon

har bar aankh ke samne ubharte manzaron

dariyaon sahraon jangalon

ganw aur shahron

ke bhiD se mujhe koi naya rang

nikalna hoga

apne paraganda zehn ko qabr mein dafn kar ke

naya but naya mandir banana hoga

purane lafzon se naya lafz

purane maani se nae maani

KHalq karne honge

yahi nahin

mujhe parina kanon mein

samaaton ke nae paimane

aankhon ke liye

nae manzar-name se tartib dene honge

chalte chalte mere jute bhi ghis gae hain

mujhe uff juton ko hi badalna hoga

aur aankhon par nai ainak lagani hogi

taki purane shishe mein nae rang

purane na dikhai den

shayad ye thakan mujhe rok na pae

shayad main in roadon ko phalang dun

shayad apne hathon se babulon ko noch

phenkun

shayad main sin ki salaKHon ko toD kar

bahar aa jaun

aur malgaji chandni ke aks ghar

apne lahu se surKH-ru kar dun

aur qadam baDhate aage nigal jaun

shayad mujhe abhi bahut dur jaana hai