mujhe jina nahin aata

maiñ jaise dard kā mausam

ghaTā ban kar jo bas jaatā hai āñkhoñ meñ

dhanak ke rañg ḳhushbū nazr karne kī tamannā le ke jis manzar talak jā.ūñ

siyah ashkoñ ke gahre kohr meñ Duubā huā pā.ūñ

meñ apne dil kā sonā

pyaar ke motī

tarastī aarzū ke phuul jis dar par sajātā huuñ

vahāñ jaise makīñ hotā nahīñ koī

banā huuñ ek muddat se sadā-e-bāzgasht aisī

jo dīvāroñ se Takrā.e

hirāsāñ ho ke lauT aa.e

dhaḌakte dil ke sūne-pan ko suunā aur kar jaa.e

maiñ apne aap ko suntā huuñ

apne aap ko chhūtā huuñ

apne aap se miltā huuñ ḳhvāboñ ke suhāne ā.ina-ghar meñ

to merā aks mujh par muskurātā hai

ye kahtā hai

salīqa tujh ko jiine kā na aanā thā nahīñ aayā

sadā.eñ pattharoñ kī tarah mujh par

mere ḳhvāboñ ke bikharte ā.ina-ghar par barastī haiñ

udhar taarā idhar jugnū

kahīñ ik phuul kī pattī kahīñ shabnam kā ik aañsū

bikhar jaatā hai sab kuchh ruuh ke sunsān sahrā meñ

maiñ phir se zindagī karne ke armāñ meñ

ik ik reze ko chuntā huuñ sajātā huuñ na.ī mūrat banātā huuñ

dhanak ke rañg ḳhushbū nazr karne kī tamannā meñ qadam aage baḌhātā huuñ

to ik be-nām gahrī dhund meñ sab Duub jaatā hai

kisī se kuchh shikāyat hai na shikva hai

ki maiñ to dard kā mausam huuñ

apne aap meñ paltā huuñ apne aap meñ jiitā huuñ

apne āñsuoñ meñ bhīgtā huuñ muskurātā huuñ

magar sab log kahte haiñ

tujhe jiinā nahīñ aatā

main jaise dard ka mausam

ghaTa ban kar jo bas jata hai aankhon mein

dhanak ke rang KHushbu nazr karne ki tamanna le ke jis manzar talak jaun

siyah ashkon ke gahre kohr mein Duba hua paun

mein apne dil ka sona

pyar ke moti

tarasti aarzu ke phul jis dar par sajata hun

wahan jaise makin hota nahin koi

bana hun ek muddat se sada-e-bazgasht aisi

jo diwaron se Takrae

hirasan ho ke lauT aae

dhaDakte dil ke sune-pan ko suna aur kar jae

main apne aap ko sunta hun

apne aap ko chhuta hun

apne aap se milta hun KHwabon ke suhane aaina-ghar mein

to mera aks mujh par muskuraata hai

ye kahta hai

saliqa tujh ko jine ka na aana tha nahin aaya

sadaen pattharon ki tarah mujh par

mere KHwabon ke bikharte aaina-ghar par barasti hain

udhar tara idhar jugnu

kahin ek phul ki patti kahin shabnam ka ek aansu

bikhar jata hai sab kuchh ruh ke sunsan sahra mein

main phir se zindagi karne ke arman mein

ek ek reze ko chunta hun sajata hun nai murat banata hun

dhanak ke rang KHushbu nazr karne ki tamanna mein qadam aage baDhata hun

to ek be-nam gahri dhund mein sab Dub jata hai

kisi se kuchh shikayat hai na shikwa hai

ki main to dard ka mausam hun

apne aap mein palta hun apne aap mein jita hun

apne aansuon mein bhigta hun muskuraata hun

magar sab log kahte hain

tujhe jina nahin aata