mujhe KHamosh rahne do

ye chiḌiyāñ chahchahātī haiñ to un ko chahchahāne do

parindoñ ko daraḳhtoñ par ḳhushī ke giit gaane do

zamīñ par abr kī har buuñd ko naġhme sunāne do

falak par lailī-e-qaus-o-quzah ko muskurāne do

mirā dil sard hai mujh ko yūñhī behosh rahne do

mujhe ḳhāmosh rahne do

fazā-e-dahr labrez-e-masarrat hai to mujh ko kyā

agar duniyā ḳharāb-e-aish-o-ishrat hai to mujh ko kyā

jo ma.amūr-e-sadā sāz-e-mohabbat hai to mujh ko kyā

jahāñ ko mere naġhmoñ kī zarūrat hai to mujh ko kyā

mujhe apne ḳhayāloñ hī se ham āġhosh rahne do

mujhe ḳhāmosh rahne do

mujhe fursat nahīñ hai fart-e-ġham se sar uThāne kī

garāñ hai mere dil par shorish-o-kāvish zamāne kī

abhī kaḌiyāñ murattab ho rahī haiñ ik fasāne kī

abhī saa.at kahāñ hai dāstān-e-dil sunāne kī

kisī kī yaad meñ mujh ko tasavvur-kosh rahne do

mujhe ḳhāmosh rahne do

jo maiñ bolā to sab ko apne ashkoñ meñ bhigo dūñgā

dil-e-insāñ meñ ġham ke saiñkaḌoñ kāñTe chubho dūñgā

jo maiñ bolā to goyā.ī zamāne-bhar kī kho dūñgā

jo maiñ bolā to duniyā ko ḳhamoshī meñ Dubo dūñgā

yahī behtar hai ḳhalvat meñ mujhe ḳhāmosh rahne do

mujhe ḳhāmosh rahne do

ye chiDiyan chahchahati hain to un ko chahchahane do

parindon ko daraKHton par KHushi ke git gane do

zamin par abr ki har bund ko naghme sunane do

falak par laili-e-qaus-o-quzah ko muskurane do

mera dil sard hai mujh ko yunhi behosh rahne do

mujhe KHamosh rahne do

faza-e-dahr labrez-e-masarrat hai to mujh ko kya

agar duniya KHarab-e-aish-o-ishrat hai to mujh ko kya

jo mamur-e-sada saz-e-mohabbat hai to mujh ko kya

jahan ko mere naghmon ki zarurat hai to mujh ko kya

mujhe apne KHayalon hi se hum aaghosh rahne do

mujhe KHamosh rahne do

mujhe fursat nahin hai fart-e-gham se sar uThane ki

garan hai mere dil par shorish-o-kawish zamane ki

abhi kaDiyan murattab ho rahi hain ek fasane ki

abhi saat kahan hai dastan-e-dil sunane ki

kisi ki yaad mein mujh ko tasawwur-kosh rahne do

mujhe KHamosh rahne do

jo main bola to sab ko apne ashkon mein bhigo dunga

dil-e-insan mein gham ke sainkaDon kanTe chubho dunga

jo main bola to goyai zamane-bhar ki kho dunga

jo main bola to duniya ko KHamoshi mein Dubo dunga

yahi behtar hai KHalwat mein mujhe KHamosh rahne do

mujhe KHamosh rahne do