mujhe mat batana

mujhe mat batānā

ki tum ne mujhe chhoḌne kā irāda kiyā thā

to kyuuñ

aur kis vaj.h se

abhī to tumhāre bichhaḌne kā dukh bhī nahīñ kam huā

abhī to maiñ

bātoñ ke va.adoñ ke shahr-e-tilismāt meñ

aañkh par ḳhush-gumānī kī paTTī liye

tum ko peḌoñ ke pīchhe daraḳhtoñ ke jhunD

aur dīvār kī pusht par DhūñDne meñ magan huuñ

kahīñ par tumhārī sadā aur kahīñ par tumhārī mahak

mujh pe hañsne meñ masrūf hai

abhī tak tumhārī hañsī se nabard-āzmā huuñ

aur is jañg meñ

merā hathiyār

apnī vafā par bharosa hai aur kuchh nahīñ

use kund karne kī koshish na karnā

mujhe mat batānā.....

mujhe mat batana

ki tum ne mujhe chhoDne ka irada kiya tha

to kyun

aur kis wajh se

abhi to tumhaare bichhaDne ka dukh bhi nahin kam hua

abhi to main

baaton ke wadon ke shahr-e-tilismat mein

aankh par KHush-gumani ki paTTi liye

tum ko peDon ke pichhe daraKHton ke jhunD

aur diwar ki pusht par DhunDne mein magan hun

kahin par tumhaari sada aur kahin par tumhaari mahak

mujh pe hansne mein masruf hai

abhi tak tumhaari hansi se nabard-azma hun

aur is jang mein

mera hathiyar

apni wafa par bharosa hai aur kuchh nahin

use kund karne ki koshish na karna

mujhe mat batana