mujhe wapas kar de

dil-e-pur-shauq kī daulat mujhe vāpas kar de

merī pahlī sī tabī.at mujhe vāpas kar de

vo tamannā.eñ vo ḳhvāhish vo taḌap vo armāñ

vo tasavvur ke khilaune vo ḳhayālāt ke khel

vo bilā-vaj.h laḌā.ī vo bilā-vaj.h kā mel

ḳhvāb-ālud saveroñ kī vo bedār shabeñ

jin meñ añgḌā.iyāñ kuchh tohmat-o-dushnām kī thiiñ

jo bahut qīmtī thiiñ aur baḌe kaam kī thiiñ

vo laḌakpan kā zamāna vo salone shab-o-roz

vo umangeñ vo tarangeñ vo tajassus vo ḳharosh

vo baḌī shoḳh javānī baḌā ma.asūm sā josh

vo lipaTne ke bahāne vo chhiTakne ke javāz

vo na samjhī huī bātoñ kā surāġh aur vo raaz

vo jhijaktī huī sāñsoñ kā sharārat bharā saaz

phir mujhe chāhiye vāpas ba-sad-andāz-o-niyāz

ai sanam-ḳhāna-e-māzī ke but-e-pur-e.ajāz

lā mire lahje kī luknat mujhe vāpas kar de

lā mirā sīġha-e-ulfat mujhe vāpas kar de

lā mirī avvalīñ chāhat mujhe vāpas kar de

lā mirī saarī mohabbat mujhe vāpas kar de

dil-e-pur-shauq ki daulat mujhe wapas kar de

meri pahli si tabiat mujhe wapas kar de

wo tamannaen wo KHwahish wo taDap wo arman

wo tasawwur ke khilaune wo KHayalat ke khel

wo bila-wajh laDai wo bila-wajh ka mel

KHwab-alud saweron ki wo bedar shaben

jin mein angDaiyan kuchh tohmat-o-dushnam ki thin

jo bahut qimti thin aur baDe kaam ki thin

wo laDakpan ka zamana wo salone shab-o-roz

wo umangen wo tarangen wo tajassus wo KHarosh

wo baDi shoKH jawani baDa masum sa josh

wo lipaTne ke bahane wo chhiTakne ke jawaz

wo na samjhi hui baaton ka suragh aur wo raaz

wo jhijakti hui sanson ka shararat bhara saz

phir mujhe chahiye wapas ba-sad-andaz-o-niyaz

ai sanam-KHana-e-mazi ke but-e-pur-eajaz

la mere lahje ki luknat mujhe wapas kar de

la mera sigha-e-ulfat mujhe wapas kar de

la meri awwalin chahat mujhe wapas kar de

la meri sari mohabbat mujhe wapas kar de