mukafat

rahī hai hazrat-e-yazdāñ se dostī merī

rahā hai zohd se yārāna ustuvār merā

guzar ga.ī hai taqaddus meñ zindagī merī

dil ahrman se rahā hai satīza-kār merā

kisī pe ruuh numāyāñ na ho sakī merī

rahā hai apnī umañgoñ pe iḳhtiyār merā

dabā.e rakkhā hai siine meñ apnī aahoñ ko

vahīñ diyā hai shab o roz pech-o-tāb unheñ

zabān-e-shauq banāyā nahīñ nigāhoñ ko

kiyā nahīñ kabhī vahshat meñ be-naqāb unheñ

ḳhayāl hī meñ kiyā parvarish gunāhoñ kī

kabhī kiyā na javānī se bahryāb unheñ

ye mil rahī hai mere zabt kī sazā mujh ko

ki ek zahr se labrez hai shabāb merā

azīyatoñ se bharī hai har ek bedārī

muhīb o rūh-satāñ hai har ek ḳhvāb merā

ulajh rahī haiñ navā.eñ mere sarūdoñ kī

fishār-e-zabt se be-tāb hai rabāb merā

magar ye zabt mere qahqahoñ kā dushman thā

pyām-e-marg-e-javānī thā ijtināb merā

lo aa ga.ī haiñ vo ban kar muhīb tasvīreñ

vo ārzueñ ke jin kā kiyā thā ḳhuuñ maiñ ne

lo aa ga.e haiñ vahī pairvān-e-ahraman

kiyā thā jin ko siyāsat se sar-nigūñ maiñ ne

kabhī na jaan pe dekhā thā ye azāb-e-alīm

kabhī nahīñ ai mere baḳht-e-vāzhgūñ maiñ ne

magar ye jitnī aziyyat bhī deñ mujhe kam hai

kiyā hai ruuh ko apnī bahut zubūñ maiñ ne

ise na hone diyā maiñ ne ham-navā-e-shabāb

na is pe chalne diyā shauq kā fusūñ maiñ ne

ai kaash chhup ke kahīñ ik gunāh kar letā

halāvatoñ se javānī ko apnī bhar letā

gunāh ek bhī ab tak kiyā na kyuuñ maiñ ne

rahi hai hazrat-e-yazdan se dosti meri

raha hai zohd se yarana ustuwar mera

guzar gai hai taqaddus mein zindagi meri

dil ahrman se raha hai satiza-kar mera

kisi pe ruh numayan na ho saki meri

raha hai apni umangon pe iKHtiyar mera

dabae rakkha hai sine mein apni aahon ko

wahin diya hai shab o roz pech-o-tab unhen

zaban-e-shauq banaya nahin nigahon ko

kiya nahin kabhi wahshat mein be-naqab unhen

KHayal hi mein kiya parwarish gunahon ki

kabhi kiya na jawani se bahryab unhen

ye mil rahi hai mere zabt ki saza mujh ko

ki ek zahr se labrez hai shabab mera

aziyaton se bhari hai har ek bedari

muhib o ruh-satan hai har ek KHwab mera

ulajh rahi hain nawaen mere sarudon ki

fishaar-e-zabt se be-tab hai rabab mera

magar ye zabt mere qahqahon ka dushman tha

pyam-e-marg-e-jawani tha ijtinab mera

lo aa gai hain wo ban kar muhib taswiren

wo aarzuen ke jin ka kiya tha KHun main ne

lo aa gae hain wahi pairwan-e-ahraman

kiya tha jin ko siyasat se sar-nigun main ne

kabhi na jaan pe dekha tha ye azab-e-alim

kabhi nahin ai mere baKHt-e-wazhgun main ne

magar ye jitni aziyyat bhi den mujhe kam hai

kiya hai ruh ko apni bahut zubun main ne

ise na hone diya main ne ham-nawa-e-shabab

na is pe chalne diya shauq ka fusun main ne

ai kash chhup ke kahin ek gunah kar leta

halawaton se jawani ko apni bhar leta

gunah ek bhi ab tak kiya na kyun main ne