mukalima

''havā ke parde meñ kaun hai jo charāġh kī lau se kheltā hai

koī to hogā

jo ḳhil.at-e-intisāb pahnā ke vaqt kī rau se kheltā hai

koī to hogā

hijāb ko ramz-e-nūr kahtā hai aur partav se kheltā hai

koī to hogā''

''koī nahīñ hai

kahīñ nahīñ hai

ye ḳhush-yaqīnoñ ke ḳhush-gumānoñ ke vāhime haiñ jo har savālī se bai.at-e-e'tibār lete haiñ

us ko andar se maar dete haiñ''

''to kaun hai vo jo lauh-e-āb-e-ravāñ pe sūraj ko sabt kartā hai aur bādal uchhāltā hai

jo bādaloñ ko samundaroñ par kashīd kartā hai aur batn-e-sadaf meñ ḳhurshīd Dhāltā hai

vo sañg meñ aag, aag meñ rañg, rañg meñ raushnī ke imkān rakhne vaalā

vo ḳhaak meñ saut, saut meñ harf, harf meñ zindagī ke sāmān rakhne vaalā

nahīñ koī hai

kahīñ koī hai

koī to hogā''

hawa ke parde mein kaun hai jo charagh ki lau se khelta hai

koi to hoga

jo KHilat-e-intisab pahna ke waqt ki rau se khelta hai

koi to hoga

hijab ko ramz-e-nur kahta hai aur partaw se khelta hai

koi to hoga

koi nahin hai

kahin nahin hai

ye KHush-yaqinon ke KHush-gumanon ke wahime hain jo har sawali se baiat-e-e'tibar lete hain

us ko andar se mar dete hain

to kaun hai wo jo lauh-e-ab-e-rawan pe suraj ko sabt karta hai aur baadal uchhaalta hai

jo baadalon ko samundaron par kashid karta hai aur batn-e-sadaf mein KHurshid Dhaalta hai

wo sang mein aag, aag mein rang, rang mein raushni ke imkan rakhne wala

wo KHak mein saut, saut mein harf, harf mein zindagi ke saman rakhne wala

nahin koi hai

kahin koi hai

koi to hoga