mulk hai ya maqtal

tumhārī ḳhūb-sūratī hai yā maut kā ḳhayāl

bāġhoñ meñ is baar kuchh ziyāda hī khile haiñ gulāb

dekho in moroñ kī āñkhoñ meñ bādaloñ kā tavīl intizār

hamārī bechārgī tumhāre nāz-o-andāz

tārīḳh gavāh hai

kitābeñ bharī paḌī hai zinda afsānoñ se

is kashmakash kā hāsil kyā hai

vasl yā firāq

ye āḌī-tirchhī sī lakīreñ

jin se bane ho.e dā.ere ko ham mulk kahte haiñ

jahāñ āzādī ke liye rūheñ rahtī haiñ taḌaptī

qaid-ḳhāne nahīñ to aur kyā haiñ

yug biit ga.e

vaqt badal gayā

kitābeñ chaaT Daalī ga.iiñ

lekin kahīñ koī masīhā sach kahne ko aaj bhī nahīñ tayyār

kahte haiñ ki āñkhoñ meñ chhupī huī hotī hai

maut kī aahaT

ghar ho yā bāzār kisī se nazar milāte hī

in dinoñ hone lagtī hai ghabrāhaT

kyā nafāsat se chābuk mārte haiñ hukkām

maza aa rahā hai kahte haiñ avaam

tumhaari KHub-surati hai ya maut ka KHayal

baghon mein is bar kuchh ziyaada hi khile hain gulab

dekho in moron ki aankhon mein baadalon ka tawil intizar

hamari bechaargi tumhaare naz-o-andaz

tariKH gawah hai

kitaben bhari paDi hai zinda afsanon se

is kashmakash ka hasil kya hai

wasl ya firaq

ye aaDi-tirchhi si lakiren

jin se bane hoe daere ko hum mulk kahte hain

jahan aazadi ke liye ruhen rahti hain taDapti

qaid-KHane nahin to aur kya hain

yug bit gae

waqt badal gaya

kitaben chaT Dali gain

lekin kahin koi masiha sach kahne ko aaj bhi nahin tayyar

kahte hain ki aankhon mein chhupi hui hoti hai

maut ki aahaT

ghar ho ya bazar kisi se nazar milate hi

in dinon hone lagti hai ghabrahaT

kya nafasat se chabuk marte hain hukkaam

maza aa raha hai kahte hain awam