munajat-e-bewa

Altaf Hussain Hali

munajat-e-bewa

Altaf Hussain Hali

MORE BYAltaf Hussain Hali

    (1)

    ai sab se avval aur āḳhir

    jahāñ-tahāñ, hāzir aur nāzir

    ai sab dānāoñ se daanā

    saare tavānāoñ se tavānā

    ai bālā, har bālā-tar se

    chāñd se sūraj se ambar se

    ai samjhe būjhe bin sūjhe

    jāne-pahchāne bin būjhe

    sab se anokhe sab se nirāle

    aañkh se ojhal dil ke ujāle

    ai andhoñ aañkh ke taare

    ai lañgḌe lūloñ ke sahāre

    nātiyoñ se chhoToñ ke naatī

    sāthiyoñ se bichhḌoñ ke sāthī

    naav jahāñ khene vaale

    dukh meñ tasallī dene vaale

    jab ab tab tujh nahīñ koī

    tujh se haiñ sab tujh nahīñ koī

    jot hai terī jal aur thal meñ

    baas hai terī phuul aur phal meñ

    har dil meñ hai terā baserā

    paas aur ghar duur hai terā

    raah tirī dushvār aur sukḌī

    naam tirā rah-gīr lakḌī

    hai Thikānā miskīnoñ

    hai sahārā ġhamgīnoñ

    hai akeloñ rakhvālā

    hai añdhere ghar ujālā

    laagū achchhe aur bure

    ḳhvāhāñ khoTe aur khare

    bed nirāse bīmāroñ

    gāhak mande bāzāroñ

    soch meñ dil bahlāne vaale

    biptā meñ yaad aane vaale

    (2)

    ai be-vāris gharoñ ke vāris

    be-bāzū be-paroñ ke vāris

    be-āsoñ aas hai

    jāgte sote paas hai

    bas vaale haiñ be-bas haiñ

    nahīñ jin vo be-kas haiñ

    sāthī jin dhyān hai terā

    dusrāyat vahāñ nahīñ parvā

    dil meñ hai jin ke terī baḌā.ī

    ginte haiñ vo parbat ko raa.ī

    bekas ġham-ḳhvār hai

    burī banī yaar hai

    dukhiyā dukhī yatīm aur beva

    tere haath un sab hai khevā

    maraz de davā de

    davā-dārū meñ shifā de

    pilā.e zahr ke pyāle

    phir amrit zahr meñ Daale

    diloñ meñ aag lagā.e

    diloñ lagī bujhā.e

    chumkāre chumkār ke maare

    maare maar ke phir chumkāre

    pyaar tere pūchhnā kyā hai

    maar meñ bhī ik terī mazā hai

    (3)

    ai rahmat aur haibat vaale

    shafqat aur dabāġhat vaale

    ai aTkal aur dhyān se bāhar

    jaan se aur pahchān se bāhar

    aql se koī nahīñ saktā

    bhed tire hukmoñ meñ haiñ kyā kyā

    ek ko ne shaad kiyā hai

    ek ke dil ko daaġh diyā hai

    us se na terā pyaar kuchh aisā

    us se na bezār kuchh aisā

    har dam terī aan na.ī hai

    jab dekho tab shaan na.ī hai

    yahāñ pachhuā hai vahāñ purvā hai

    ghar ghar terā hukm nayā hai

    phuul kahīñ kumlā.e hue haiñ

    aur kahīñ phal aa.e hue haiñ

    khetī ek hai lahrātī

    ek har dam ḳhuun sukhātī

    ek paḌe haiñ dhan ko Dubo.e

    ek haiñ ghoḌe bech ke so.e

    ek ne jab se hosh sambhālā

    rañj se us ko paḌā na paalā

    ek ne is janjāl meñ aa kar

    chain na dekhā aañkh uThā kar

    meñh kahīñ daulat hai barastā

    hai koī paanī tak ko tarastā

    ek ko marne tak nahīñ dete

    ek uktā gayā lete lete

    haal ġharaz duniyā yahī hai

    ġham pahle aur ba.ad ḳhushī hai

    rañj hai duniyā ke gilā kyā

    tohfa yahī le de ke hai yaañ

    yahāñ nahīñ bantī rañj sahe bin

    rañj nahīñ sab ek se lekin

    ek se yahāñ rañj ek hai baalā

    ek se hai dard ek nirālā

    ghaav hai go nāsūr sūrat

    par use kyā nāsūr se nisbat

    tap vahī diq shakl hai lekin

    diq nahīñ rahtī jaan liye bin

    diq ho vo nāsūr ho kuchh ho

    de na jo ab ummīd kisī ko

    roz ġham kyūñ-kar sahe koī

    aas na jab baaqī rahe koī

    kar insāf ai mire maulā

    kaun hai jo be-ās hai jiitā

    go ki bahut bande haiñ pur-armāñ

    kam haiñ magar māyūs haiñ jo yaañ

    ḳhvāh dukhī hai ḳhvāh sukhī hai

    jo hai ik ummīd us ko bañdhī hai

    khetiyāñ jin khaḌī haiñ sūkhī

    aas vo bāñdhe baiThe haiñ meñh

    ghaTā jin asāḌī meñ hai

    sāvanī ummīd nahīñ hai

    Duub chukī hai un agetī

    detī hai Dhāras un ko pachhetī

    ek hai is ummīd pe jiitā

    ab huī beTī ab huā beTā

    ek ko jo aulād milī hai

    us ko umañg shādiyoñ hai

    rañj hai qismat meñ ḳhushī hai

    kuchh hai magar ik aas bañdhī hai

    ġham nahīñ un ko ġhamgīñ haiñ

    jo dil nā-umīd nahīñ haiñ

    kaal meñ kuchh saḳhtī nahīñ aisī

    kaal meñ hai jab aas samayñ

    sahal hai maujoñ se chhuTkārā

    jab ki nazar aatā hai kinārā

    par nahīñ uTh saktī vo musībat

    aa.egī jis ke ba.ad na rāhat

    shaad ho us rah-gīr kyā dil?

    mar ke kaTegī jis manzil

    un ujḌoñ ko kal paḌe kyūñ-kar

    ghar na basegā jin janam bhar

    un bichhḌoñ kyā hai Thikānā?

    jin ko na milne degā zamāna

    ab ye balā Taltī nahīñ Taalī

    mujh pe hai jo taqdīr ne Daalī

    aa.iiñ bahut duniyā meñ bahāreñ

    aish ghar ghar paḌīñ pukāreñ

    paḌe bahut bāġhoñ meñ jhūle

    Dhaak bahut jañgal meñ phūle

    ga.iiñ aur aa.eñ chāñdnī rāteñ

    barsīñ khulīñ bahut barsāteñ

    par na khilī hargiz na khilegī

    vo jo kalī murjhā.ī thī dil

    aas bas naam hai duniyā

    jab na rahī yahī to rahā kyaa?

    aise bidesī nahīñ ġham kuchh

    jis ko na ho milne qasam kuchh

    ronā un ban-bāsiyoñ hai

    des nikālā jin ko milā hai

    hukm se tere par nahīñ chāra

    kaḌvī mīThī sab hai gavārā

    zor hai kyā patte havā par

    chāhe jidhar le jaa.e uḌā kar

    tinkā ik aur saat samundar

    jaa.e kahāñ maujoñ se nikal kar

    qismat meñ jab thī judā.ī

    phir Taltī kis tarah ye aa.ii?

    aaj bigḌī ho to bane bhī

    azal bigḌī ḳhaak banegī

    jo chāhe vo nahīñ Taltā

    bande yaañ bas nahīñ chaltā

    maare aur na de rone

    thapke aur na de sone

    Thahre ban aatī hai na bhāge

    terī zabardastī ke aage

    tujh se kahīñ gar bhāgnā chāheñ

    band haiñ chāroñ khūñT rāheñ

    maare aur ḳhvāh navāze

    paḌī huī huuñ maiñ tere darvāze

    tujh ko apnā jāntī huuñ maiñ

    tujh se nahīñ to kis se kahūñ maiñ

    maañ sadā bachche ko maare

    aur bachcha maañ maañ pukāre

    (4)

    ai mire zor aur qudrat vaale

    hikmat aur hukūmat vaale

    maiñ lauñDī terī dukhyāre

    darvāze terī bhikārī

    maut ḳhvāhāñ jaan dushman

    jaan apnī hai aap ajīran

    apne parā.e dhutkārī

    maike aur sasurāl pe bhārī

    sah ke bahut āzār chalī huuñ

    duniyā se bezār chalī huuñ

    dil par mere daaġh haiñ jitne

    muñh meñ bol nahīñ haiñ utne

    dukh dil kuchh kah nahīñ saktī

    is ke sivā kuchh kah nahīñ saktī

    tujh pe hai raushan sab dukh dil

    tujh se haqīqat apnī kahūñ kyā

    byaah ke dam paa.ī thī na lene

    lene ke yaañ paḌ ga.e dene

    ḳhushī meñ bhī dukh saath na aayā

    ġham ke sivā kuchh haat na aayā

    ek ḳhushī ne ġham ye dikhā.e

    ek hañsī ne gul khilā.e

    kaisā thā ye byaah nināvāñ

    jūñhī paḌā is parchāvāñ

    chain se rahne diyā na ko

    kar diyā maliyāmeT ḳhushī ko

    ro nahīñ saktī tañg huuñ yaañ tak

    aur ro.uuñ to ro.uuñ kahāñ tak

    hañs hañs dil bahlā.ūñ kyūñ-kar

    osoñ pyaas bujhā.ūñ kyūñ-kar

    ek kuchh jiinā nahīñ hotā

    ek na hañstā bhalā na rotā

    leTe gar sone ke bahāne

    pā.entī kal hai aur na sirhāne

    jāgiye to bhī ban nahīñ paḌtī

    jāgne āḳhir koī had bhī

    ab kal ham ko paḌegī mar kar

    gor hai suunī sej se behtar

    baat se nafrat kaam se vahshat

    TuuTī aas aur bujhī tabī.at

    ābādī jañgal namūna

    duniyā suunī aur ghar suunā

    din hai bhayānak aur raat Darānī

    yuuñ guzrī saarī ye javānī

    bahneñ aur bahneliyāñ merī

    saath jo thiiñ kheliyāñ merī

    mil na sakīñ khol ke mujh se

    ḳhush na huiiñ hañs bol ke mujh se

    jab aa.iiñ ro-dho ke ga.iiñ vo

    jab ga.iiñ be-kal ho ke ga.iiñ vo

    koī nahīñ dil bahlāvā

    aa nahīñ chuktā merā bulāvā

    aaTh pahar hai ye julāpā

    kāTūñgī kis tarah rañDāpā

    thak ga.ī dukh sahte sahte

    tham ga.e aañsū bahte bahte

    aag khulī dil na kisī par

    ghul ga.ī jaan andar andar

    dekh ke chup jaanā na kisī ne

    jaan ko phūñkā dil lagī ne

    dabī thī bhobhal meñ chiñgārī

    na kisī ne ḳhabar hamārī

    qaum meñ vo ḳhushiyāñ biyāhoñ

    shahr meñ vo dho.eñ sāhoñ

    tyauhāroñ aa.e din aanā

    aur sab tyauhār manānā

    vo chait aur phāgun havā.eñ

    vo sāvan bhādoñ ghaTā.eñ

    vo garmī chāñdnī rāteñ

    vo armān bharī barsāteñ

    kis se kahūñ kis taur se kāTeñ

    ḳhair kaTeñ jis taur se kāTeñ

    chaav ke aur ḳhushiyoñ ke samay sab

    aate haiñ ḳhush kal jaan ko ho jab

    rañj meñ haiñ sāmān ḳhushī ke

    aur jalāne vaale ke

    ghar barkhā aur piyā bidesī

    aa.iyo barkhā kahīñ na aisī

    din ye javānī ke kaTe aise

    baaġh meñ panchhī qaid ho jaise

    rut ga.ī saarī sar Takrāte

    uḌ na sake par hote saare

    kisī ne hogī kuchh kal paa.ī

    mujhe to shādī raas na aa.ī

    aas bañdhī lekin na milā kuchh

    phuul aayā aur phal na lagā kuchh

    rah gayā de kar chāñd dikhā.ī

    chāñd huā par iid na aa.ī

    phal ḳhātir barchhī khaa.ī

    phal na milā aur jaan gañvā.ī

    ret meñ zarre dekh chamakte

    dauḌ paḌī meñ jhiil samajh ke

    chāroñ khūñT nazar dauḌā.ī

    par paanī buuñd na paa.ī

    (1)

    ai sab se awwal aur aaKHir

    jahan-tahan, hazir aur nazir

    ai sab danaon se dana

    sare tawanaon se tawana

    ai baala, har baala-tar se

    chand se suraj se ambar se

    ai samjhe bujhe bin sujhe

    jaane-pahchane bin bujhe

    sab se anokhe sab se nirale

    aankh se ojhal dil ke ujale

    ai andhon ki aankh ke tare

    ai langDe lulon ke sahaare

    natiyon se chhoTon ke nati

    sathiyon se bichhDon ke sathi

    naw jahan ki khene wale

    dukh mein tasalli dene wale

    jab ab tab tujh sa nahin koi

    tujh se hain sab tujh sa nahin koi

    jot hai teri jal aur thal mein

    bas hai teri phul aur phal mein

    har dil mein hai tera basera

    tu pas aur ghar dur hai tera

    rah teri dushwar aur sukDi

    nam tera rah-gir ki lakDi

    tu hai Thikana miskinon ka

    tu hai sahaara ghamginon ka

    tu hai akelon ka rakhwala

    tu hai andhere ghar ka ujala

    lagu achchhe aur bure ka

    KHwahan khoTe aur khare ka

    bed nirase bimaron ka

    gahak mande bazaron ka

    soch mein dil bahlane wale

    bipta mein yaad aane wale

    (2)

    ai be-waris gharon ke waris

    be-bazu be-paron ke waris

    be-ason ki aas hai tu hi

    jagte sote pas hai tu hi

    bas wale hain ya be-bas hain

    tu nahin jin ka wo be-kas hain

    sathi jin ka dhyan hai tera

    dusrayat ki wahan nahin parwa

    dil mein hai jin ke teri baDai

    ginte hain wo parbat ko rai

    bekas ka gham-KHwar hai tu hi

    buri bani ka yar hai tu hi

    dukhiya dukhi yatim aur bewa

    tere hi hath un sab ka hai khewa

    tu hi maraz de tu hi dawa de

    tu hi dawa-daru mein shifa de

    tu hi pilae zahr ke pyale

    tu hi phir amrit zahr mein Dale

    tu hi dilon mein aag lagae

    tu hi dilon ki lagi bujhae

    chumkare chumkar ke mare

    mare mar ke phir chumkare

    pyar ka tere puchhna kya hai

    mar mein bhi ek teri maza hai

    (3)

    ai rahmat aur haibat wale

    shafqat aur dabaghat wale

    ai aTkal aur dhyan se bahar

    jaan se aur pahchan se bahar

    aql se koi pa nahin sakta

    bhed tere hukmon mein hain kya kya

    ek ko tu ne shad kiya hai

    ek ke dil ko dagh diya hai

    us se na tera pyar kuchh aisa

    us se na tu bezar kuchh aisa

    har dam teri aan nai hai

    jab dekho tab shan nai hai

    yahan pachhua hai wahan purwa hai

    ghar ghar tera hukm naya hai

    phul kahin kumlae hue hain

    aur kahin phal aae hue hain

    kheti ek ki hai lahraati

    ek ka har dam KHun sukhati

    ek paDe hain dhan ko Duboe

    ek hain ghoDe bech ke soe

    ek ne jab se hosh sambhaala

    ranj se us ko paDa na pala

    ek ne is janjal mein aa kar

    chain na dekha aankh uTha kar

    meinh kahin daulat ka hai barasta

    hai koi pani tak ko tarasta

    ek ko marne tak nahin dete

    ek ukta gaya lete lete

    haal gharaz duniya ka yahi hai

    gham pahle aur baad KHushi hai

    ranj ka hai duniya ke gila kya

    tohfa yahi le de ke hai yan ka

    yahan nahin banti ranj sahe bin

    ranj nahin sab ek se lekin

    ek se yahan ranj ek hai baala

    ek se hai dard ek nirala

    ghaw hai go nasur ki surat

    par use kya nasur se nisbat

    tap wahi diq ki shakl hai lekin

    diq nahin rahti jaan liye bin

    diq ho wo ya nasur ho kuchh ho

    de na jo ab ummid kisi ko

    roz ka gham kyun-kar sahe koi

    aas na jab baqi rahe koi

    tu hi kar insaf ai mere maula

    kaun hai jo be-as hai jita

    go ki bahut bande hain pur-arman

    kam hain magar mayus hain jo yan

    KHwah dukhi hai KHwah sukhi hai

    jo hai ek ummid us ko bandhi hai

    khetiyan jin ki khaDi hain sukhi

    aas wo bandhe baiThe hain meinh ki

    ghaTa jin ki asaDi mein hai

    sawani ki ummid nahin hai

    Dub chuki hai un ki ageti

    deti hai Dhaaras un ko pachheti

    ek hai is ummid pe jita

    ab hui beTi ab hua beTa

    ek ko jo aulad mili hai

    us ko umang shadiyon ki hai

    ranj hai ya qismat mein KHushi hai

    kuchh hai magar ek aas bandhi hai

    gham nahin un ko ghamgin hain

    jo dil na-umid nahin hain

    kal mein kuchh saKHti nahin aisi

    kal mein hai jab aas samayn ki

    sahal hai maujon se chhuTkara

    jab ki nazar aata hai kinara

    par nahin uTh sakti wo musibat

    aaegi jis ke baad na rahat

    shad ho us rah-gir ka kya dil?

    mar ke kaTegi jis ki manzil

    un ujDon ko kal paDe kyun-kar

    ghar na basega jin ka janam bhar

    un bichhDon ka kya hai Thikana?

    jin ko na milne dega zamana

    ab ye bala Talti nahin Tali

    mujh pe hai jo taqdir ne Dali

    aain bahut duniya mein bahaaren

    aish ki ghar ghar paDin pukaren

    paDe bahut baghon mein jhule

    Dhak bahut jangal mein phule

    gain aur aaen chandni raaten

    barsin khulin bahut barsaten

    par na khili hargiz na khilegi

    wo jo kali murjhai thi dil ki

    aas hi ka bas nam hai duniya

    jab na rahi yahi to raha kya?

    aise bidesi ka nahin gham kuchh

    jis ko na ho milne ki qasam kuchh

    rona un ban-basiyon ka hai

    des nikala jin ko mila hai

    hukm se tere par nahin chaara

    kaDwi miThi sab hai gawara

    zor hai kya patte ka hawa par

    chahe jidhar le jae uDa kar

    tinka ek aur sat samundar

    jae kahan maujon se nikal kar

    qismat hi mein jab thi judai

    phir Talti kis tarah ye aai?

    aaj ki bigDi ho to bane bhi

    azal ki bigDi KHak banegi

    tu jo chahe wo nahin Talta

    bande ka yan bas nahin chalta

    mare aur na de tu rone

    thapke aur na de tu sone

    Thahre ban aati hai na bhage

    teri zabardasti ke aage

    tujh se kahin gar bhagna chahen

    band hain chaaron khunT ki rahen

    tu mare aur KHwah nawaze

    paDi hui hun main tere darwaze

    tujh ko apna jaanti hun main

    tujh se nahin to kis se kahun main

    man hi sada bachche ko mare

    aur bachcha man man hi pukare

    (4)

    ai mere zor aur qudrat wale

    hikmat aur hukumat wale

    main launDi teri dukhyare

    darwaze ki teri bhikari

    maut ki KHwahan jaan ki dushman

    jaan apni hai aap ajiran

    apne parae ki dhutkari

    maike aur sasural pe bhaari

    sah ke bahut aazar chali hun

    duniya se bezar chali hun

    dil par mere dagh hain jitne

    munh mein bol nahin hain utne

    dukh dil ka kuchh kah nahin sakti

    is ke siwa kuchh kah nahin sakti

    tujh pe hai raushan sab dukh dil ka

    tujh se haqiqat apni kahun kya

    byah ke dam pai thi na lene

    lene ke yan paD gae dene

    KHushi mein bhi dukh sath na aaya

    gham ke siwa kuchh hat na aaya

    ek KHushi ne gham ye dikhae

    ek hansi ne gul hi khilae

    kaisa tha ye byah ninawan

    junhi paDa is ka parchawan

    chain se rahne diya na ji ko

    kar diya maliyameT KHushi ko

    ro nahin sakti tang hun yan tak

    aur roun to roun kahan tak

    hans hans dil bahlaun kyun-kar

    oson pyas bujhaun kyun-kar

    ek ka kuchh jina nahin hota

    ek na hansta bhala na rota

    leTe gar sone ke bahane

    paenti kal hai aur na sirhane

    jagiye to bhi ban nahin paDti

    jagne ki aaKHir koi had bhi

    ab kal hum ko paDegi mar kar

    gor hai suni sej se behtar

    baat se nafrat kaam se wahshat

    TuTi aas aur bujhi tabiat

    aabaadi jangal ka namuna

    duniya suni aur ghar suna

    din hai bhayanak aur raat Darani

    yun guzri sari ye jawani

    bahnen aur bahneliyan meri

    sath ki jo thin kheliyan meri

    mil na sakin ji khol ke mujh se

    KHush na huin hans bol ke mujh se

    jab aain ro-dho ke gain wo

    jab gain be-kal ho ke gain wo

    koi nahin dil ka bahlawa

    aa nahin chukta mera bulawa

    aaTh pahar ka hai ye julapa

    kaTungi kis tarah ranDapa

    thak gai dukh sahte sahte

    tham gae aansu bahte bahte

    aag khuli dil ki na kisi par

    ghul gai jaan andar hi andar

    dekh ke chup jaana na kisi ne

    jaan ko phunka dil ki lagi ne

    dabi thi bhobhal mein chingari

    li na kisi ne KHabar hamari

    qaum mein wo KHushiyan biyahon ki

    shahr mein wo dhoen sahon ki

    tyauhaaron ka aae din aana

    aur sab ka tyauhaar manana

    wo chait aur phagun ki hawaen

    wo sawan bhadon ki ghaTaen

    wo garmi ki chandni raaten

    wo arman bhari barsaten

    kis se kahun kis taur se kaTen

    KHair kaTen jis taur se kaTen

    chaw ke aur KHushiyon ke samay sab

    aate hain KHush kal jaan ko ho jab

    ranj mein hain saman KHushi ke

    aur jalane wale hi ke

    ghar barkha aur piya bidesi

    aaiyo barkha kahin na aisi

    din ye jawani ke kaTe aise

    bagh mein panchhi qaid ho jaise

    rut gai sari sar Takraate

    uD na sake par hote sare

    kisi ne hogi kuchh kal pai

    mujhe to shadi ras na aai

    aas bandhi lekin na mila kuchh

    phul aaya aur phal na laga kuchh

    rah gaya de kar chand dikhai

    chand hua par id na aai

    phal ki KHatir barchhi khai

    phal na mila aur jaan ganwai

    ret mein zarre dekh chamakte

    dauD paDi mein jhil samajh ke

    chaaron khunT nazar dauDai

    par pani ki bund na pai

    Source :
    • Book : intekhab-e-sukhan (Pg. 41)
    • Author : Ibne Kanwal
    • Publication : Kitabi Duniya (2005-2008)
    • Edition : 2005-2008
    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY