muntaKHab-e-rozgar abulkalam-azad

qadam qadam pe aqīdat se sar hai ḳham merā

chalā hai sū-e-rah-e-mo'atabar qalam merā

dil-o-dimāġh ko ūñchā banā diyā jis ne

fuyūz-e-ilm se a.alā banā yā jis ne

baḌe ḳhulūs se detā thā dars-e-insānī

hue haiñ jis kī badaulat zamīr nūrānī

vo jis ne rāh-e-mohabbat dikhā.ī thī ham ko

vo jis ne rasm-e-uḳhuvvat sikhā.ī thī ham ko

vo jis ne bartar-o-bālā ḳhayāl baḳhshā thā

jo lā-zavāl hai aisā kamāl baḳhshā thā

vo ek fikr jo bā-e'tibār kartī hai

nazar meñ kābil-sad-iftiḳhār kartī hai

vo jis ne ziist sajā.ī jalā.e dil ke charāġh

usī ke soz ne baḳhshī hameñ matā-e-dimāġh

usī ne tarz-e-takallum kī chāshnī dī hai

usī ne ilm kī ḳhush-rañg zindagī dī hai

usī ne harf-e-hidāyat se sarfarāz kiyā

ḳhudā kā shukr hameñ āshnā-e-rāz kiyā

guloñ se pyaar anādil se us kā yārāna

sukūn-o-amn kā markaz thā us kā kāshāna

matā-e-ilm luTātī rahī hai zaat us kī

bahut darāz thī zulf-e-navāzishāt us kī

ruḳh-e-hayāt ko baḳhshī hai ik jilā us ne

shu.ūr zauq-e-nazar kā atā kiyā us ne

sukūn dil ko mayassar thā us kī qurbat se

ham ahl-e-hind kī azmat hai us kī nisbat se

ufuq pe ubhrā jo vo al-hilāl kī sūrat

javān ho ke rahī al-balāġh kī fitrat

haiñ tazkire meñ kuchh aise nuqūsh-e-fikr-e-jamīl

ġhubar-e-ḳhātir-o-ḳhutabāt kī sajeñ qindīl

jo tarjumān se phailī kalām kī ḳhushbū

sañvāre us ne hī pechīda aql ke gesū

usī ne sāz-e-adab ko sadā-e-nau baḳhshī

shikasta-dil ko anokhī adā-e-nau baḳhshī

dayār-e-gul meñ vo aayā thā muskurātā huā

har ek ḳhār-e-chaman ko gale lagātā huā

guloñ kā rañg sabā kā shi.ār laayā thā

vo ik bahār thā husn-e-bahār laayā thā

na us bahār se ab tak bharā thā dil apnā

ki chand lamhoñ ko us se lagā thā dil apnā

qazā-e-husn chaman ko chaman se chhīn liyā

shabāb jaise navelī dulhan se chhīn liyā

bahār hai na vajūd-e-bahār baaqī hai

diloñ meñ yād-e-numūd-e-bahār baaqī hai

buzurg-o-muḳhlish-o-ālī-vaqār thā vo shaḳhs

ki ek muntaḳhab-e-rozgār thā vo shaḳhs

qadam qadam pe aqidat se sar hai KHam mera

chala hai su-e-rah-e-mo'atabar qalam mera

dil-o-dimagh ko uncha bana diya jis ne

fuyuz-e-ilm se aala bana ya jis ne

baDe KHulus se deta tha dars-e-insani

hue hain jis ki badaulat zamir nurani

wo jis ne rah-e-mohabbat dikhai thi hum ko

wo jis ne rasm-e-uKHuwwat sikhai thi hum ko

wo jis ne bartar-o-baala KHayal baKHsha tha

jo la-zawal hai aisa kamal baKHsha tha

wo ek fikr jo ba-e'tibar karti hai

nazar mein kabil-sad-iftiKHar karti hai

wo jis ne zist sajai jalae dil ke charagh

usi ke soz ne baKHshi hamein mata-e-dimagh

usi ne tarz-e-takallum ki chashni di hai

usi ne ilm ki KHush-rang zindagi di hai

usi ne harf-e-hidayat se sarfaraaz kiya

KHuda ka shukr hamein aashna-e-raaz kiya

gulon se pyar anadil se us ka yarana

sukun-o-amn ka markaz tha us ka kashana

mata-e-ilm luTati rahi hai zat us ki

bahut daraaz thi zulf-e-nawazishat us ki

ruKH-e-hayat ko baKHshi hai ek jila us ne

shuur zauq-e-nazar ka ata kiya us ne

sukun dil ko mayassar tha us ki qurbat se

hum ahl-e-hind ki azmat hai us ki nisbat se

ufuq pe ubhra jo wo al-hilal ki surat

jawan ho ke rahi al-balagh ki fitrat

hain tazkire mein kuchh aise nuqush-e-fikr-e-jamil

ghubar-e-KHatir-o-KHutabaat ki sajen qindil

jo tarjuman se phaili kalam ki KHushbu

sanware us ne hi pechida aql ke gesu

usi ne saz-e-adab ko sada-e-nau baKHshi

shikasta-dil ko anokhi ada-e-nau baKHshi

dayar-e-gul mein wo aaya tha muskuraata hua

har ek KHar-e-chaman ko gale lagata hua

gulon ka rang saba ka shiar laya tha

wo ek bahaar tha husn-e-bahaar laya tha

na us bahaar se ab tak bhara tha dil apna

ki chand lamhon ko us se laga tha dil apna

qaza-e-husn chaman ko chaman se chhin liya

shabab jaise naweli dulhan se chhin liya

bahaar hai na wajud-e-bahaar baqi hai

dilon mein yaad-e-numud-e-bahaar baqi hai

buzurg-o-muKHlish-o-ali-waqar tha wo shaKHs

ki ek muntaKHab-e-rozgar tha wo shaKHs