murda-KHana

duniyā kī īlā-billā Thasī paḌī hai mujh meñ

haañ kuchh kaam kī chīzeñ bhī haiñ is kabāḌ-ḳhāne meñ

ilhāmī kitāboñ se le kar falsafa-e-adab aur shā.irī tak kī

libraryāñ bharī paḌī haiñ dimāġh meñ

āñkhoñ meñ utar kar dekheñ to husn-e-do-ālam pā.eñge jalva-afroz

puure puure nigār-ḳhāne mere bhī sanam-ḳhāne tere bhī sanam-ḳhāne

kānoñ meñ baiThuoñ se le kar kop-land kī samfaniyāñ

aur tansen kī bandishoñ se raushan-ārā begam kī gā.ikī tak mahfūz hai aaj bhī

lekin gañd to machā rakkhā hai mere jism ne

aur is ke andar dhaḌakte dil ne

gandagī kā Dipo hai merā ye jism

balki kārḳhāna hai gandagī kā

achchhī se achchhī chiiz Dāleñ aap is meñ

bol-o-barāz banā kar rakh detā hai use

Daal kar dekheñ haañ haañ ye phal Dāleñ ye miThā.ī

ye tikke aur kabāb Dāleñ is meñ

aur phir naak par rūmāl rakh kar dekheñ ki bantā kyā hai in kā

ḳhair jahāñ kār-ḳhāne huuñ vahāñ gandagī to hotī hai lāziman

gandagī na ho to ālūdgī sahī

īd-e-qurbān par shahr kā chakkar to lagyā hī hogā aap ne

azīz-o-aqārib se milne ke liye

jo kuchh saḌkoñ aur galiyoñ meñ nazar aatā hai ojhaḌiyoñ aur āñtoñ se ubaltā huā

vahī kuchh hai mere andar bhī

ye to merī khaal kā kamāl hai jo aap ne paas biThā rakkhā hai mujhe

aur agar aap meñ jhāñkne kī himmat ho mere dil meñ

to shāyad abhī uThā deñ apne paas se mujhe

karda gunāhoñ kī nahīñ nā-karda gunāhoñ kī baat kar rahā huuñ maiñ

ḳhvāhishoñ aur hasratoñ ke janāze paḌe haiñ

mere dil meñ qatār-andar-qatār

maiñ ne tashbīh dī thī kabāḌ-ḳhāne se apne aap ko

asal meñ to ek bahut baḌā murda-ḳhāna huuñ maiñ

fasādāt meñ qatl-e-ām dekhā ho shāyad aap ne

zalzale meñ maare jaane vāloñ kī lāsheñ nikālte to dekhā hogā logoñ ko

yā phir television par bosina aur kosvo meñ ijtimā.ī qabroñ kī khudā.ī ke manāzir

jab lavāhiqīn koshish kar rahe hote haiñ lāshoñ ko pahchānñe kī

aur naak phaT rahe hote haiñ un ke saḌāñd se

jald-az-jald dobāra dafnā dī jaatī haiñ ye lāsheñ

lekin mere dil meñ ḳhvāhishoñ aur hasratoñ kī lāsheñ gal-saḌ ga.ī haiñ paḌe paḌe

aur maiñ phir bhī dafan nahīñ kartā unheñ

dafn karnā chāhtā hī nahīñ

aur chāhūñ bhī to kahāñ karūñ dafn unheñ

dimāġh meñ

dimāġh meñ kulbulātā hāfiza kahāñ mohlat detā hai us kī

dil hī to hai jis meñ dafnā saktā huuñ unheñ

inhī murda ḳhvāhishoñ aur hasratoñ ko dekh dekh kar to jiitā huuñ maiñ

ye to dafan hoñgī mere saath hī

aur ab samajh meñ aatā hai ki kyuuñ banā.ī jaatī haiñ baḌī baḌī qabreñ

bādshāh log to marne se pahle hī banvā liyā karte the apne maqbare aur ehrām

mujhe ghin aatī thī baḌī baḌī qabroñ se

maiñ kahā kartā thā dekho un māl-zādoñ ko

zindagī meñ bhī ghere rakhte the zarūrat se ziyāda zamīn

aur mar kar bhī itnī jagah gher lete haiñ ki ḳhudā kī zinda maḳhlūq ko mayassar nahīñ sar chhupāne ko

mar kar bhī nahīñ miTtī zamīn kī hirs un kī

magar ab sochtā huuñ shāyad unheñ vāqa.ī zarūrat ho baḌī qabroñ kī

shāyad un ke andar paḌe huuñ mujh se bhī ziyāda janāze

ḳhvāhishoñ aur hasratoñ ke

shāyad un kī ojhaḌiyoñ aur āñtoñ meñ ġhalāzat ho mujh se bhī ziyāda

vaise kahīñ maiñ bhī to javāz nahīñ DhūñDh rahā apne liye kushāda qabr kā

duniya ki ila-billa Thasi paDi hai mujh mein

han kuchh kaam ki chizen bhi hain is kabaD-KHane mein

ilhami kitabon se le kar falsafa-e-adab aur shairi tak ki

libraryan bhari paDi hain dimagh mein

aankhon mein utar kar dekhen to husn-e-do-alam paenge jalwa-afroz

pure pure nigar-KHane mere bhi sanam-KHane tere bhi sanam-KHane

kanon mein baiThuon se le kar kop-land ki samfaniyan

aur tansen ki bandishon se raushan-ara begam ki gaiki tak mahfuz hai aaj bhi

lekin gand to macha rakkha hai mere jism ne

aur is ke andar dhaDakte dil ne

gandagi ka Dipo hai mera ye jism

balki karKHana hai gandagi ka

achchhi se achchhi chiz Dalen aap is mein

bol-o-baraaz bana kar rakh deta hai use

Dal kar dekhen han han ye phal Dalen ye miThai

ye tikke aur kabab Dalen is mein

aur phir nak par rumal rakh kar dekhen ki banta kya hai in ka

KHair jahan kar-KHane hun wahan gandagi to hoti hai laziman

gandagi na ho to aaludgi sahi

id-e-qurban par shahr ka chakkar to lagya hi hoga aap ne

aziz-o-aqarib se milne ke liye

jo kuchh saDkon aur galiyon mein nazar aata hai ojhaDiyon aur aanton se ubalta hua

wahi kuchh hai mere andar bhi

ye to meri khaal ka kamal hai jo aap ne pas biTha rakkha hai mujhe

aur agar aap mein jhankne ki himmat ho mere dil mein

to shayad abhi uTha den apne pas se mujhe

karda gunahon ki nahin na-karda gunahon ki baat kar raha hun main

KHwahishon aur hasraton ke janaze paDe hain

mere dil mein qatar-andar-qatar

main ne tashbih di thi kabaD-KHane se apne aap ko

asal mein to ek bahut baDa murda-KHana hun main

fasadat mein qatl-e-am dekha ho shayad aap ne

zalzale mein mare jaane walon ki lashen nikalte to dekha hoga logon ko

ya phir telewision par bosina aur koswo mein ijtimai qabron ki khudai ke manazir

jab lawahiqin koshish kar rahe hote hain lashon ko pahchanne ki

aur nak phaT rahe hote hain un ke saDand se

jald-az-jald dobara dafna di jati hain ye lashen

lekin mere dil mein KHwahishon aur hasraton ki lashen gal-saD gai hain paDe paDe

aur main phir bhi dafan nahin karta unhen

dafn karna chahta hi nahin

aur chahun bhi to kahan karun dafn unhen

dimagh mein

dimagh mein kulbulata hafiza kahan mohlat deta hai us ki

dil hi to hai jis mein dafna sakta hun unhen

inhi murda KHwahishon aur hasraton ko dekh dekh kar to jita hun main

ye to dafan hongi mere sath hi

aur ab samajh mein aata hai ki kyun banai jati hain baDi baDi qabren

baadshah log to marne se pahle hi banwa liya karte the apne maqbare aur ehram

mujhe ghin aati thi baDi baDi qabron se

main kaha karta tha dekho un mal-zadon ko

zindagi mein bhi ghere rakhte the zarurat se ziyaada zamin

aur mar kar bhi itni jagah gher lete hain ki KHuda ki zinda maKHluq ko mayassar nahin sar chhupane ko

mar kar bhi nahin miTti zamin ki hirs un ki

magar ab sochta hun shayad unhen waqai zarurat ho baDi qabron ki

shayad un ke andar paDe hun mujh se bhi ziyaada janaze

KHwahishon aur hasraton ke

shayad un ki ojhaDiyon aur aanton mein ghalazat ho mujh se bhi ziyaada

waise kahin main bhi to jawaz nahin DhunDh raha apne liye kushada qabr ka