musafir parinde

ufuq tā ufuq nīlgūñ āsmāñ

musāfir parindoñ kī manzil kahāñ

bahut duur pīchhe ko us bahr ke māvarā

utartī rahī barf jamtī rahī tah-ba-tah āshiyānoñ ke paas

tab nazāre nazar-āshnā

izn-e-āvārgī zād-e-afsurdagī de ke tharrā.e bā-chashm-e-tar

ki shāyad bahut duur aage ko

us bahr ke māvarā

zamurrad juḌe sāhiloñ ne sunā ho salām iid kā

dhuup ke jashn āhaTeñ

naġhma-e-garm ḳhurshīd kā

ufuq tā ufuq nīlgūñ āsmāñ

koī shāḳh-e-gul hai na koī muñDer

ghaḌī-do-ghaḌī pañkhuḌī jaise par joḌ kar baiTh jaa.eñ jahāñ

ghaḌī-do-ghaḌī chahchahā.eñ jahāñ

koī apne dukhte ko ko agar agar meñ gir gayā

zarā bhī fazāoñ kā dāman na bhīgā

na vahshī havāoñ kā tūfāñ rukā

sitāre ba-dastūr nīlāhaToñ meñ chamakte rahe

misl-e-gardāb gardāñ shab-o-roz kī charḳhiyāñ

musāfir parindoñ kī manzil kahāñ

bahut duur pīchhe ko us bahr ke māvarā

har na.ī dil-kushā agnī munjamid

zer-e-ahrām yaḳh-mahv-e-ḳhvāb

saaz nahroñ ke darbār-e-fasl-e-bahārāñ ke

tābūt sadr nag Tīloñ ke phūloñ ke

tāj-o-guhar

munjamid zindagī kī fuġhāñ

bahut duur aage ko us bahr ke māvarā

vo ik raushnī kā jahāñ

vo ik gul pas-e-ḳhār-zār

vo ik dāna-e-zer-e-dām

use dekhnā aur ThiThaknā bhī kyā chiiz hai

magar aah us moḌ par aaj parvāz-o-āvāz thī

hāsil-e-musht par

hāsil-e-dāstāñ

ufuq ta ufuq nilgun aasman

musafir parindon ki manzil kahan

bahut dur pichhe ko us bahr ke mawara

utarti rahi barf jamti rahi tah-ba-tah aashiyanon ke pas

tab nazare nazar-ashna

izn-e-awargi zad-e-afsurdagi de ke tharrae ba-chashm-e-tar

ki shayad bahut dur aage ko

us bahr ke mawara

zamurrad juDe sahilon ne suna ho salam id ka

dhup ke jashn aahaTen

naghma-e-garm KHurshid ka

ufuq ta ufuq nilgun aasman

koi shaKH-e-gul hai na koi munDer

ghaDi-do-ghaDi pankhuDi jaise par joD kar baiTh jaen jahan

ghaDi-do-ghaDi chahchahaen jahan

koi apne dukhte ko ko agar agar mein gir gaya

zara bhi fazaon ka daman na bhiga

na wahshi hawaon ka tufan ruka

sitare ba-dastur nilahaTon mein chamakte rahe

misl-e-gardab gardan shab-o-roz ki charKHiyan

musafir parindon ki manzil kahan

bahut dur pichhe ko us bahr ke mawara

har nai dil-kusha agni munjamid

zer-e-ahram yaKH-mahw-e-KHwab

saz nahron ke darbar-e-fasl-e-bahaaran ke

tabut sadr nag Tilon ke phulon ke

taj-o-guhar

munjamid zindagi ki fughan

bahut dur aage ko us bahr ke mawara

wo ek raushni ka jahan

wo ek gul pas-e-KHar-zar

wo ek dana-e-zer-e-dam

use dekhna aur ThiThakna bhi kya chiz hai

magar aah us moD par aaj parwaz-o-awaz thi

hasil-e-musht par

hasil-e-dastan