musalahat

maiñ bhī na pūchhūñ tum bhī na pūchho

mere maazī kī peshānī

kitne butoñ ko puuj chukī hai

kitne sajdoñ kī tābānī

chaukhaT chaukhaT baañT chukī hai

mere maazī ke tāqoñ meñ

kitnī sham.eñ pighal chukī haiñ

kitne dāman ḳhaak hue haiñ

tum bhī na pūchho maiñ bhī na pūchhūñ

tum ne ye shādāb javānī

kaise aur kis tarah guzārī

in āñkhoñ ke paimānoñ meñ

kitne aks utāre tum ne

kitne ḳhvāb sajā.e tum ne

shahar ke kitne dīvānoñ se

qaul-o-qasam iqrār kiye haiñ

kitne garebāñ chaak hue haiñ

tum bhī na pūchho maiñ bhī na pūchhūñ

vo dekho vo kal hai hamārā

chhoTā sā ghar sajā-sajāyā

ham tum baiThe ik kamre meñ

taash kī baazī khel rahe haiñ

main bhi na puchhun tum bhi na puchho

mere mazi ki peshani

kitne buton ko puj chuki hai

kitne sajdon ki tabani

chaukhaT chaukhaT banT chuki hai

mere mazi ke taqon mein

kitni shamen pighal chuki hain

kitne daman KHak hue hain

tum bhi na puchho main bhi na puchhun

tum ne ye shadab jawani

kaise aur kis tarah guzari

in aankhon ke paimanon mein

kitne aks utare tum ne

kitne KHwab sajae tum ne

shahar ke kitne diwanon se

qaul-o-qasam iqrar kiye hain

kitne gareban chaak hue hain

tum bhi na puchho main bhi na puchhun

wo dekho wo kal hai hamara

chhoTa sa ghar saja-sajaya

hum tum baiThe ek kamre mein

tash ki bazi khel rahe hain