musibat ki KHabren

musībat kī ḳhabreñ

suno shaam vaalo musībat kī ḳhabreñ

garebān dāman talak chaak kar do

saroñ par savāroñ kī roñdī huī ḳhaak Daalo

abū-qais ko maut ne khā liyā hai

amīr-e-damishq in dinoñ sogvārī meñ haiñ

ġhamoñ ke añdheroñ meñ jakḌe hue

huzn kī aag se un kā dil jal gayā

aah bū-qais kī maut ke baar se jhuk ga.e haiñ ḳhalīfa ke shāne

abū-qais kyā thā tumheñ kyā ḳhabar shaam vaalo

abū-qais baḌe shahsavāroñ meñ thā

vo ḳhalīfa kā rāz-āshnā, bandagān-e-ḳhudā meñ muqarrab

yazīd-ibn-e-maisūn kī shab kā sāthī

abū-qais hiñda ke pote kā tanhā sahārā

vahī surḳh bandar

jo maisūn apne qabīle se laa.ī

bahut shauq se naam us kā abū-qais rakhā

phir apnī amānat arab aur ajam ke ḳhalīfa ko sauñpī

usī sāhib-e-taḳht-o-tāj-o-tarab ko

jise aaj islām kī pāsbānī kā puurā sharaf hai

usī kā aur abū-qais bandar

ḳhudā us ko baḳhshe

use ghuḌ-savārī meñ aisī mahārat thī jis kā bayāñ karnā qudrat se bāhar

kisī shḳhs-e-bad-baḳht ne us ke ghoḌe ko bidkā diyā

us ke paañv rikāboñ se nikle

abū-qais nīche girā aur mīloñ talak Thokaroñ par rahā

aah kis be-kasī meñ adam ko sidhārā

musībat, musībat

suno ahl-e-islām

abū-qais kī maut aisā baḌā sāneha hai

ki jis kī musībat se āl-umayya ke qasroñ meñ raakh aur dhuāñ bhar gayā hai

duaa!

duā kī zarūrat

abū-qais kī maġhfirat ke liye

aur yazīd-ibn-e-hiñda ke sabr o jazā ke liye

musibat ki KHabren

suno sham walo musibat ki KHabren

gareban daman talak chaak kar do

saron par sawaron ki rondi hui KHak Dalo

abu-qais ko maut ne kha liya hai

amir-e-damishq in dinon sogwari mein hain

ghamon ke andheron mein jakDe hue

huzn ki aag se un ka dil jal gaya

aah bu-qais ki maut ke bar se jhuk gae hain KHalifa ke shane

abu-qais kya tha tumhein kya KHabar sham walo

abu-qais baDe shahsawaron mein tha

wo KHalifa ka raaz-ashna, bandagan-e-KHuda mein muqarrab

yazid-ibn-e-maisun ki shab ka sathi

abu-qais hinda ke pote ka tanha sahaara

wahi surKH bandar

jo maisun apne qabile se lai

bahut shauq se nam us ka abu-qais rakha

phir apni amanat arab aur ajam ke KHalifa ko saunpi

usi sahib-e-taKHt-o-taj-o-tarab ko

jise aaj islam ki pasbani ka pura sharaf hai

usi ka aur abu-qais bandar

KHuda us ko baKHshe

use ghuD-sawari mein aisi mahaarat thi jis ka bayan karna qudrat se bahar

kisi shKHs-e-bad-baKHt ne us ke ghoDe ko bidka diya

us ke panw rikabon se nikle

abu-qais niche gira aur milon talak Thokaron par raha

aah kis be-kasi mein adam ko sidhaara

musibat, musibat

suno ahl-e-islam

abu-qais ki maut aisa baDa saneha hai

ki jis ki musibat se aal-umayya ke qasron mein rakh aur dhuan bhar gaya hai

dua!

dua ki zarurat

abu-qais ki maghfirat ke liye

aur yazid-ibn-e-hinda ke sabr o jaza ke liye