mustaqbil

mustaqbil ik bachcha hai

haal kī god tak aate aate

ruḳhsāroñ par us ke sabze kī chādar chhā jaatī hai

phir karvaT letī hai ḳhizāñ kī zahr meñ Duubī kaalī kaalī tez nigāh

ruḳh pe tamāñche lagte haiñ

dard ke sahrā meñ ik laḌkā jo kal tak ik bachcha thā

sahmā sahmā ruk ruk kar aage baḌhtā jaatā hai

aur kabhī ye bhī hotā hai

dil ke darvāzoñ par aa kar ḳhvāb kī pariyāñ hañstī haiñ aur ye laḌkā

in pariyoñ ke lālach meñ hañs hañs kar aage baḌhtā hai

vaqt ke rath par donoñ yūñhī aage pīchhe bhāgte haiñ

aage pīchhe

jaane kab tak

aur āḳhir vo manzil bhī aa jaatī hai

jab ye alhaḌ sā laḌkā jo kal tak ik ma.asūm sā nanhā bachcha thā

shāne par ḳhvāboñ kī laash uThā.e

dil meñ apne zaḳhm-e-tamannā kā nashtar aur dard chhupā.e

siine meñ aatī jaatī sāñsoñ kā tūfān liye

āñkhoñ meñ ik pyaas liye

thakā thakā sā

gir paḌtā hai sustāne ko

god meñ apne maazī kī

aur jab uThtā hai to duniyā us ko būḌhā kahtī hai

mustaqbil ek bachcha hai

haal ki god tak aate aate

ruKHsaron par us ke sabze ki chadar chha jati hai

phir karwaT leti hai KHizan ki zahr mein Dubi kali kali tez nigah

ruKH pe tamanche lagte hain

dard ke sahra mein ek laDka jo kal tak ek bachcha tha

sahma sahma ruk ruk kar aage baDhta jata hai

aur kabhi ye bhi hota hai

dil ke darwazon par aa kar KHwab ki pariyan hansti hain aur ye laDka

in pariyon ke lalach mein hans hans kar aage baDhta hai

waqt ke rath par donon yunhi aage pichhe bhagte hain

aage pichhe

jaane kab tak

aur aaKHir wo manzil bhi aa jati hai

jab ye alhaD sa laDka jo kal tak ek masum sa nanha bachcha tha

shane par KHwabon ki lash uThae

dil mein apne zaKHm-e-tamanna ka nashtar aur dard chhupae

sine mein aati jati sanson ka tufan liye

aankhon mein ek pyas liye

thaka thaka sa

gir paDta hai sustane ko

god mein apne mazi ki

aur jab uThta hai to duniya us ko buDha kahti hai