mutriba

shab kī ḳhamoshiyoñ meñ soī huī hai duniyā

chup-chāp haiñ sitāre ḳhāmosh āsmāñ hai

lekin ai mutriba tū bedār hai abhī tak

ik iztirāb-e-dariyā dil meñ tire nihāñ hai

bastī se duur aa kar baiThī hai kyoñ lab-e-jū

barbat liye baġhal meñ kuchh gungunā rahī thī

naġhma-sarā.iyoñ pe āmāda thī tabī.at

aahaT ko merī pā kar ḳhāmosh ho ga.ī hai

aane se mere shāyad barham huī hai ḳhalvat

maiñ bū-e-naġhma pā kar aayā thā ġham bhulāne

muñh moḌ kar jahāñ se phirtā huuñ dasht-o-sahrā

masrūf-e-justujū huuñ manzil se be-ḳhabar huuñ

duniyā ke gulistāñ kā bhaTkā huā huuñ taa.ir

jo shāḳh se na Tapkā vo ras bharā samar huuñ

rañgīñ-navā.iyoñ se dil kī lagī bujhā de

phir chheḌ apnā barbat phir hosh mere kho de

naġhmoñ se tere gūñje saarī fazā-e-sahrā

rūhul-qudus ke shahpar raag apnā bhuul jaa.eñ

jannat ke tā.eroñ meñ ik hashr sā ho barpā

tere suroñ ko sun kar tham jaa.eñ bahte dariyā

har taan terī goyā hai ābshār-e-naġhma

sehr-e-halāl hai ye yā hai tirā tarannum

terī dabī sadā hai yā paḌ rahī hai shabnam

terī dhuneñ nahīñ haiñ ġhunchoñ kā hai tabassum

terī ḳhamoshiyāñ bhī kyā ras-bharī haiñ kaa.in

gar chheḌ de ai jogan merā bhī tū do-tāra

ho jaa.eñ zindagī ke naġhme hazār paidā

Dhal jaa.e ruuh merī sarmast zamzamoñ meñ

mausīqī-e-abad ke dil meñ hoñ taar paidā

haañ chheḌ de do-tāra maiñ kab se muntazir huuñ

shab ki KHamoshiyon mein soi hui hai duniya

chup-chap hain sitare KHamosh aasman hai

lekin ai mutriba tu bedar hai abhi tak

ek iztirab-e-dariya dil mein tere nihan hai

basti se dur aa kar baiThi hai kyon lab-e-ju

barbat liye baghal mein kuchh gunguna rahi thi

naghma-saraiyon pe aamada thi tabiat

aahaT ko meri pa kar KHamosh ho gai hai

aane se mere shayad barham hui hai KHalwat

main bu-e-naghma pa kar aaya tha gham bhulane

munh moD kar jahan se phirta hun dasht-o-sahra

masruf-e-justuju hun manzil se be-KHabar hun

duniya ke gulistan ka bhaTka hua hun tair

jo shaKH se na Tapka wo ras bhara samar hun

rangin-nawaiyon se dil ki lagi bujha de

phir chheD apna barbat phir hosh mere kho de

naghmon se tere gunje sari faza-e-sahra

ruhul-qudus ke shahpar rag apna bhul jaen

jannat ke taeron mein ek hashr sa ho barpa

tere suron ko sun kar tham jaen bahte dariya

har tan teri goya hai aabshaar-e-naghma

sehr-e-halal hai ye ya hai tera tarannum

teri dabi sada hai ya paD rahi hai shabnam

teri dhunen nahin hain ghunchon ka hai tabassum

teri KHamoshiyan bhi kya ras-bhari hain kain

gar chheD de ai jogan mera bhi tu do-tara

ho jaen zindagi ke naghme hazar paida

Dhal jae ruh meri sarmast zamzamon mein

mausiqi-e-abad ke dil mein hon tar paida

han chheD de do-tara main kab se muntazir hun