na-mukammal taaruf

aur janmoñ se tire andar chhupā thā vo bhī maiñ

aur tire iz.hār se bāhar uḌā thā vo bhī maiñ

aur tujh se tujh talak jo fāsla thā vo bhī maiñ

aur saare fāsloñ meñ rāsta thā vo bhī maiñ

aur terī raat kī zad par jalā thā vo bhī maiñ

aur aivān-e-falak meñ jo bujhā thā vo bhī maiñ

aur khañDar ke dil meñ jo naġhma-sarā thā vo bhī maiñ

aur sifar ke gumbadoñ meñ gūñjtā thā vo bhī maiñ

aur na hone kī fazā meñ ho gayā thā vo bhī maiñ

aur tere rañg se bichhḌā huā thā vo bhī maiñ

aur badan ke paar tujh ko DhūñDtā thā vo bhī maiñ

aur sāñsoñ ke kināroñ par basā thā vo bhī maiñ

aur adam ke bādbānoñ meñ havā thā vo bhī maiñ

aur bikhrī kahkashāñ kā silsila thā vo bhī maiñ

aur sayyāroñ ke mehvar se ugā thā vo bhī maiñ

aur azal kī ruuh se pahle banā thā vo bhī maiñ

aur abad ke us taraf ik naqsh-e-pā thā vo bhī maiñ

aur ḳhud apne se pahle aa paḌā thā vo bhī maiñ

aur ḳhud apne se pahle jā chukā thā vo bhī maiñ

aur janmon se tere andar chhupa tha wo bhi main

aur tere izhaar se bahar uDa tha wo bhi main

aur tujh se tujh talak jo fasla tha wo bhi main

aur sare faslon mein rasta tha wo bhi main

aur teri raat ki zad par jala tha wo bhi main

aur aiwan-e-falak mein jo bujha tha wo bhi main

aur khanDar ke dil mein jo naghma-sara tha wo bhi main

aur sifar ke gumbadon mein gunjta tha wo bhi main

aur na hone ki faza mein ho gaya tha wo bhi main

aur tere rang se bichhDa hua tha wo bhi main

aur badan ke par tujh ko DhunDta tha wo bhi main

aur sanson ke kinaron par basa tha wo bhi main

aur adam ke baadbanon mein hawa tha wo bhi main

aur bikhri kahkashan ka silsila tha wo bhi main

aur sayyaron ke mehwar se uga tha wo bhi main

aur azal ki ruh se pahle bana tha wo bhi main

aur abad ke us taraf ek naqsh-e-pa tha wo bhi main

aur KHud apne se pahle aa paDa tha wo bhi main

aur KHud apne se pahle ja chuka tha wo bhi main