na-rasai

chaudhvīñ raat ke chāñd aur zamīñ ke mābain

nā-rasā.ī kā jo dukh hai vo hamārā dukh hai

surma.ī hijr kī tā-hadd-e-nazar pahnā.ī

an-ginat tāroñ ke jhurmuT meñ chhupī tanhā.ī

chāñd ke dukh kā mudāvā nahīñ ye yaktā.ī

ruḳh-e-mahtāb ko chhūne kī lagan meñ be-tāb

kahkashāoñ kī urūsa ke machalte armān

sīna-e-bahr pe biphrī huī pāgal maujeñ

raat bhar shiddat-e-jazbāt se yuuñ uThtī haiñ

jis tarah pichhle pahar lams kī hasrat jaage

jaise rag rag meñ sulagtī huī tishna ḳhvāhish

jism ke saare masāmoñ meñ charāġhāñ kar de

haa.e is karb ke aalam meñ kahāñ mumkin hai

qabl-az-roz-e-jazā chāk-e-judā.ī silnā

āsmāñ-zād kā is ḳhāk-parī se milnā

quvvat-e-siql kī Doroñ se bañdhe ye ajrām

dā.eroñ meñ yuuñ muqayyad haiñ ki kuchh bhī kar leñ

ek duuje kī panāhoñ meñ nahīñ jā sakte

shāyad un nuur ke pāroñ kī tarah haiñ ham bhī

kab se mohtāt ḳhamoshī ke madāroñ meñ ravāñ

ik junūñ-ḳhez mohabbat kā safar karte haiñ

hijr meñ dil yuuñ sulagte haiñ ki jaañ jaatī hai

va.ada-e-qurb ḳhudā jaane vafā ho ki na ho

vasl kā soch ke hī jaan pe ban aatī hai

TuuT kar bikhre jo āġhāz-e-jahāñ meñ reze

sā.at-e-hashr ke aane pe hī yakjā hoñge

mehr-o-mah arz-o-samā ruuh badan bhī ya.anī

āḳhirash ek ikaa.ī meñ simaT jā.eñge

nā-rasā.ī ke azāboñ meñ yuuñ guzrī hai hayāt

jī meñ aatā hai ki ab koī qayāmat utre

toḌ kar apne madāroñ ko mulāqāteñ hoñ

mehrbāñ shāmeñ hoñ kuchh ḳhushbū bharī rāteñ hoñ

chaudhwin raat ke chand aur zamin ke mabain

na-rasai ka jo dukh hai wo hamara dukh hai

surmai hijr ki ta-hadd-e-nazar pahnai

an-ginat taron ke jhurmuT mein chhupi tanhai

chand ke dukh ka mudawa nahin ye yaktai

ruKH-e-mahtab ko chhune ki lagan mein be-tab

kahkashaon ki urusa ke machalte arman

sina-e-bahr pe biphri hui pagal maujen

raat bhar shiddat-e-jazbaat se yun uThti hain

jis tarah pichhle pahar lams ki hasrat jage

jaise rag rag mein sulagti hui tishna KHwahish

jism ke sare masamon mein charaghan kar de

hae is karb ke aalam mein kahan mumkin hai

qabl-az-roz-e-jaza chaak-e-judai silna

aasman-zad ka is KHak-pari se milna

quwwat-e-siql ki Doron se bandhe ye ajram

daeron mein yun muqayyad hain ki kuchh bhi kar len

ek duje ki panahon mein nahin ja sakte

shayad un nur ke paron ki tarah hain hum bhi

kab se mohtat KHamoshi ke madaron mein rawan

ek junun-KHez mohabbat ka safar karte hain

hijr mein dil yun sulagte hain ki jaan jati hai

wada-e-qurb KHuda jaane wafa ho ki na ho

wasl ka soch ke hi jaan pe ban aati hai

TuT kar bikhre jo aaghaz-e-jahan mein reze

saat-e-hashr ke aane pe hi yakja honge

mehr-o-mah arz-o-sama ruh badan bhi yani

aaKHirash ek ikai mein simaT jaenge

na-rasai ke azabon mein yun guzri hai hayat

ji mein aata hai ki ab koi qayamat utre

toD kar apne madaron ko mulaqaten hon

mehrban shamen hon kuchh KHushbu bhari raaten hon