na-rasai

hazāroñ pattoñ par tum ko ḳhat likhe

ek ek jaan pahchān vaale se

pūchhtā phirā huuñ

jitne muñh the utnī bāteñ

jaane kaun ho?

tum ko jāntā nahīñ, pahchāntā bahut huuñ

pata nahīñ kaun se ḳhvāb meñ

kis tārīk lamhe meñ

bechain be-nīnd raat kī kaun sī karvaT meñ

achānak raushnī sā tum ko dekhā thā

tab se tum se mohabbat ho ga.ī hai

tumhārā pur-sukūn bhar puur chehra

us par merī puurī pakaḌ hai

tum ko paane ke pāgal-pan meñ

saarī duniyā kī tārīḳh juġhrāfiya

falsafe, samājī uluum

adab, shā.irī saare funūn-e-latīfa

sab kuchh jaan liyā

tamām zamānoñ kī insānī shakleñ

tum se milātā huuñ

taqdīr ko likhe hue

aadmī ke saare mohabbat-nāme paḌhtā huuñ

shāyad kahīñ tumhārā zikr ho

abhī abhī tum ko

kasī huī bhiiḌ ke āḳhirī sire par

dekhā hai achānak

rele par relā, dhakke par dhakkā

kahīñ bhī koī shigāf nahīñ

insānī jismoñ kī ūñchī dīvār

tum tak kabhī bhī

pahuñchne na degī

hazaron patton par tum ko KHat likhe

ek ek jaan pahchan wale se

puchhta phira hun

jitne munh the utni baaten

jaane kaun ho?

tum ko jaanta nahin, pahchanta bahut hun

pata nahin kaun se KHwab mein

kis tarik lamhe mein

bechain be-nind raat ki kaun si karwaT mein

achanak raushni sa tum ko dekha tha

tab se tum se mohabbat ho gai hai

tumhaara pur-sukun bhar pur chehra

us par meri puri pakaD hai

tum ko pane ke pagal-pan mein

sari duniya ki tariKH jughrafiya

falsafe, samaji ulum

adab, shairi sare funun-e-latifa

sab kuchh jaan liya

tamam zamanon ki insani shaklen

tum se milata hun

taqdir ko likhe hue

aadmi ke sare mohabbat-name paDhta hun

shayad kahin tumhaara zikr ho

abhi abhi tum ko

kasi hui bhiD ke aaKHiri sire par

dekha hai achanak

rele par rela, dhakke par dhakka

kahin bhi koi shigaf nahin

insani jismon ki unchi diwar

tum tak kabhi bhi

pahunchne na degi