nakaami

band āñkheñ kiye sar-e-sāhil

kal sahar-dam ye sochtā thā maiñ

niiñd kī god meñ zamāna hai, beḌiyāñ toḌ duuñ, nikal jā.ūñ

vādī-e-hū meñ jā ke kho jā.ūñ

daf.atan ek mauj ne baḌh kar

apnā sar mere paañv par rakkhā

aur kahā

dekh chashm-e-dil se dekh

nīl-gūñ bahr kitnā dilkash hai

hai zamīñ kis qadar hasīn-o-jamīl

āsmāñ kitnā ḳhūb-sūrat hai

lekin ai shāhkār-e-dast-e-azal jis taraf kā tirā irāda hai

kyā pata vo dayār kaisā hai

ye fazā ye havā ye husn tujhe

kyā ḳhabar hai, vahāñ mile na mile?

aur yuuñ band ho ga.iiñ mujh par har taraf se farār kī rāheñ!

band aankhen kiye sar-e-sahil

kal sahar-dam ye sochta tha main

nind ki god mein zamana hai, beDiyan toD dun, nikal jaun

wadi-e-hu mein ja ke kho jaun

dafatan ek mauj ne baDh kar

apna sar mere panw par rakkha

aur kaha

dekh chashm-e-dil se dekh

nil-gun bahr kitna dilkash hai

hai zamin kis qadar hasin-o-jamil

aasman kitna KHub-surat hai

lekin ai shahkar-e-dast-e-azal jis taraf ka tera irada hai

kya pata wo dayar kaisa hai

ye faza ye hawa ye husn tujhe

kya KHabar hai, wahan mile na mile?

aur yun band ho gain mujh par har taraf se farar ki rahen!