nakaami

maiñ ne har chand ġham-e-ishq ko khonā chāhā

ġham-e-ulfat ġham-e-duniyā meñ samonā chāhā

vahī afsāne mirī samt ravāñ haiñ ab tak

vahī sho.ale mire siine meñ nihāñ haiñ ab tak

vahī ba-sūd ḳhalish hai mire siine meñ hanūz

vahī bekār tamannā.eñ javāñ haiñ ab tak

vahī gesū mirī rātoñ pe haiñ bikhre bikhre

vahī āñhkeñ mirī jānib nigrāñ haiñ ab tak

kasrat-e-ġham bhī mire ġham kā mudāvā na huī

mere bechain ḳhayāloñ ko sukūn mil na sakā

dil ne duniyā ke har ik dard ko apnā to liyā

muzmahil ruuh ko andāz-e-junūñ mil na sakā

merī taḳhayyul kā shīrāza-e-barham hai vahī

mere bujhte hue ehsās kā aalam hai vahī

vahī be-jān irāde vahī be-rañg savāl

vahī be-rūh kashākash vahī bechain ḳhayāl

aah is kashmakash sub.h o masā kā anjām

maiñ bhī nākām mirī sa.ī amal bhī nākām

main ne har chand gham-e-ishq ko khona chaha

gham-e-ulfat gham-e-duniya mein samona chaha

wahi afsane meri samt rawan hain ab tak

wahi shoale mere sine mein nihan hain ab tak

wahi ba-sud KHalish hai mere sine mein hanuz

wahi bekar tamannaen jawan hain ab tak

wahi gesu meri raaton pe hain bikhre bikhre

wahi aanhken meri jaanib nigran hain ab tak

kasrat-e-gham bhi mere gham ka mudawa na hui

mere bechain KHayalon ko sukun mil na saka

dil ne duniya ke har ek dard ko apna to liya

muzmahil ruh ko andaz-e-junun mil na saka

meri taKHayyul ka shiraaza-e-barham hai wahi

mere bujhte hue ehsas ka aalam hai wahi

wahi be-jaan irade wahi be-rang sawal

wahi be-ruh kashakash wahi bechain KHayal

aah is kashmakash subh o masa ka anjam

main bhi nakaam meri sai amal bhi nakaam