nara-e-haq

jafā-shi.ār sitam-kesh hurriyat dushman

Darā rahā hai tū āñkheñ ye kyā dikhā ke mujhe

mire qadam ko ho jumbish ye ġhair-mumkin hai

payām-e-shauq se de dard-o-ibtilā ke mujhe

koī mujhe rah-e-haq se haTā nahīñ saktā

agar yaqīn na ho dekh le haTā ke mujhe

zabāñ pe kalima-e-haq ke sivā jo harf aa jaa.e

to phūñk de mirī ġhairat abhī jalā ke mujhe

hai āshnā mire kām-o-dahan se talḳhī-e-ġham

ye zahar dekh le sau martaba pilā ke mujhe

hai mere vāste me.arāj-e-rūh taḳhta-e-dār

tū ḳhush agar hai to ho daar par chaḌhā ke mujhe

fanā hai mere liye muzhda-e-baqā-e-davām

sunā rahā hai tū ahkām kyā qazā ke mujhe

sivā ḳhudā ke kisī se maiñ dab nahīñ saktā

na rakh sakegā tū hargiz kabhī dabā ke mujhe

tire ḳhayāl meñ gar huuñ maiñ qābil-e-tasḳhīr

to dekh le ġham-o-ālām meñ phañsā ke mujhe

mirī taraf se ijāzat hai tujh ko aam us kī

ki de sake tū ġham-o-rañj intihā ke mujhe

ḳhushī ke saath huuñ raazī har ibtilā ke liye

tū muntaḳhab mujhe kar to sahī jafā ke liye

jafa-shiar sitam-kesh hurriyat dushman

Dara raha hai tu aankhen ye kya dikha ke mujhe

mere qadam ko ho jumbish ye ghair-mumkin hai

payam-e-shauq se de dard-o-ibtila ke mujhe

koi mujhe rah-e-haq se haTa nahin sakta

agar yaqin na ho dekh le haTa ke mujhe

zaban pe kalima-e-haq ke siwa jo harf aa jae

to phunk de meri ghairat abhi jala ke mujhe

hai aashna mere kaam-o-dahan se talKHi-e-gham

ye zahar dekh le sau martaba pila ke mujhe

hai mere waste mearaj-e-ruh taKHta-e-dar

tu KHush agar hai to ho dar par chaDha ke mujhe

fana hai mere liye muzhda-e-baqa-e-dawam

suna raha hai tu ahkaam kya qaza ke mujhe

siwa KHuda ke kisi se main dab nahin sakta

na rakh sakega tu hargiz kabhi daba ke mujhe

tere KHayal mein gar hun main qabil-e-tasKHir

to dekh le gham-o-alam mein phansa ke mujhe

meri taraf se ijazat hai tujh ko aam us ki

ki de sake tu gham-o-ranj intiha ke mujhe

KHushi ke sath hun raazi har ibtila ke liye

tu muntaKHab mujhe kar to sahi jafa ke liye