nae KHauf ka aazar

mehrbāñ din vo mirā dard-shanās

apnī zambīl ke sad-rañg zaḳhīre se mujhe

roz detā rahā sauġhāt na.ī

mujh pe kartā rahā har roz ināyāt na.ī

dil ko barmātā rahā

ḳhuuñ ko garmātā rahā

aa.ī jis vaqt magar raat na.ī

apnā sarmāya sameTe hue mastūr huā

dil mirā faiz-e-gurezāñ se shikasta-ḳhātir

shab ke zindāñ meñ giraftār

ġharīb-o-nādār

ik na.e ḳhauf ke āzār se ma.amūr huā

mehrban din wo mera dard-shanas

apni zambil ke sad-rang zaKHire se mujhe

roz deta raha saughat nai

mujh pe karta raha har roz inayat nai

dil ko barmata raha

KHun ko garmata raha

aai jis waqt magar raat nai

apna sarmaya sameTe hue mastur hua

dil mera faiz-e-gurezan se shikasta-KHatir

shab ke zindan mein giraftar

gharib-o-nadar

ek nae KHauf ke aazar se mamur hua