nae leader ki dua

bhagvān mire dil ko vo zinda tamanna de

jo hirs ko bhaḌkā de aur jeb ko garmā de

vādī-e-siyāsat ke is zarre ko chamkā de

is ḳhādim-e-adnā ko ik kursī-e-ālā de

auroñ kā jo hissa hai mujh ko vahī daatā de

mahrūm-e-batāshā huuñ tū puurī na halvā de

haañ murġh-e-musallam de haañ garm parāThā de

sūkhī huī āñtoñ ko fauran hī jo chiknā de

tahrīr meñ chustī de taqrīr meñ garmī de

jantā ko jo phailā.e aur qaum ko bahkā de

kursī-e-vazārat par ik jast meñ chaḌh jā.ūñ

tadbīr ko phurtī de taqdīr ko jhaTkā de

sikhlā de mujhe daatā vo rāz-e-jahāñbānī

qatre se jo dariyā de dariyā ko jo qatra de

muflis kī lañgoTī tak bātoñ meñ utarvā luuñ

ehsān ke parde meñ chorī kā salīqa de

qātil kī tabī.at ko bismil kī adā sikhlā

ḳhūñ-rezī ke jazbe ko hamdardī kā pardā de

thoḌī sī jo ġhairat hai vo bhī na rahe baaqī

ehsās-e-hamiyyat ko is dil se nikalvā de

al-qissa mire mālik tujh se ye guzārish hai

murġhī vo ināyat ho sone kā jo anDā de

bhagwan mere dil ko wo zinda tamanna de

jo hirs ko bhaDka de aur jeb ko garma de

wadi-e-siyasat ke is zarre ko chamka de

is KHadim-e-adna ko ek kursi-e-ala de

auron ka jo hissa hai mujh ko wahi data de

mahrum-e-batasha hun tu puri na halwa de

han murgh-e-musallam de han garm paraTha de

sukhi hui aanton ko fauran hi jo chikna de

tahrir mein chusti de taqrir mein garmi de

janta ko jo phailae aur qaum ko bahka de

kursi-e-wazarat par ek jast mein chaDh jaun

tadbir ko phurti de taqdir ko jhaTka de

sikhla de mujhe data wo raaz-e-jahanbani

qatre se jo dariya de dariya ko jo qatra de

muflis ki langoTi tak baaton mein utarwa lun

ehsan ke parde mein chori ka saliqa de

qatil ki tabiat ko bismil ki ada sikhla

KHun-rezi ke jazbe ko hamdardi ka parda de

thoDi si jo ghairat hai wo bhi na rahe baqi

ehsas-e-hamiyyat ko is dil se nikalwa de

al-qissa mere malik tujh se ye guzarish hai

murghi wo inayat ho sone ka jo anDa de