naghma-e-jaan

phir koī naġhma-e-jāñ chheḌ ki shab baaqī hai

an-sunā giit koī raqs-gah-e-anjum meñ

uljhe uljhe hue bāloñ se ulajhtā huā giit

mahkī mahkī huī sāñsoñ meñ sulagtā huā giit

phir sajāyā hai hathelī pe tire naam kā diip

aur havāoñ se ulajhte haiñ sañbhal jaate haiñ

silsile ḳhvāb ke bad-mast havā ke sāthī

dil meñ ik jot jalāte haiñ bujhā jaate haiñ

mere takiye pe sajī hai koī be-kal ḳhvāhish

sochtī huuñ ki use niiñd kī vaadī le jā.ūñ

apnī sahmī huī bāhoñ kā banā kar gherā

sang apne hī rakhūñ duur na hone pā.ūñ

an-sunā giit koī raqs-gah-e-anjum meñ

phir koī naġhma-e-jāñ chheḌ ki shab baaqī hai

phir koi naghma-e-jaan chheD ki shab baqi hai

an-suna git koi raqs-gah-e-anjum mein

uljhe uljhe hue baalon se ulajhta hua git

mahki mahki hui sanson mein sulagta hua git

phir sajaya hai hatheli pe tere nam ka dip

aur hawaon se ulajhte hain sanbhal jate hain

silsile KHwab ke bad-mast hawa ke sathi

dil mein ek jot jalate hain bujha jate hain

mere takiye pe saji hai koi be-kal KHwahish

sochti hun ki use nind ki wadi le jaun

apni sahmi hui bahon ka bana kar ghera

sang apne hi rakhun dur na hone paun

an-suna git koi raqs-gah-e-anjum mein

phir koi naghma-e-jaan chheD ki shab baqi hai