najm-e-sahar

vaqt-e-sahar, ḳhāmosh dhuñdlakā naach rahā hai sehn-e-jahāñ meñ

tābinda, pur-nūr sitāre, jagmag jagmag karte karte

haar chuke haiñ apnī himmat, Duub chuke haiñ bahr-e-falak meñ

tārīkī ke tūfānoñ meñ apnī kashtī khete khete

lekin ik bā-himmat taarā ab bhī āñkheñ khol rahā hai

ab bhī jahāñ ko dekh rahā hai apnī mastāna nazroñ se

jaise kisī tālāb meñ lachke koī shagufta phuul kañval kā

jaise bele kī shāḳhoñ meñ duur se ek shagūfa chamke

vaqt-e-sahr, ḳhāmosh dhuñdlakā ek sitāra kaañp rahā hai

jaise koī bosīda kashtī tūfānoñ meñ Dol rahī ho

koī diyā raushan ho jaise qabristān meñ tāq-e-lahad par

jis kī lau anjām ke Dar se ghaTtī ho aur tharrātī ho

vaqt-e-sahar ḳhāmosh dhuñdlakā ek sitāra kaañp rahā hai

ruḳh par jis ke khel rahā hai ab bhī tabassum halkā halkā

vo aayā ik nuur kā dhārā jalvoñ kī būñdeñ barsātā

jagmag jagmag kartā kartā Duub gayā ma.asūm sitāra

waqt-e-sahar, KHamosh dhundlaka nach raha hai sehn-e-jahan mein

tabinda, pur-nur sitare, jagmag jagmag karte karte

haar chuke hain apni himmat, Dub chuke hain bahr-e-falak mein

tariki ke tufanon mein apni kashti khete khete

lekin ek ba-himmat tara ab bhi aankhen khol raha hai

ab bhi jahan ko dekh raha hai apni mastana nazron se

jaise kisi talab mein lachke koi shagufta phul kanwal ka

jaise bele ki shaKHon mein dur se ek shagufa chamke

waqt-e-sahr, KHamosh dhundlaka ek sitara kanp raha hai

jaise koi bosida kashti tufanon mein Dol rahi ho

koi diya raushan ho jaise qabristan mein taq-e-lahad par

jis ki lau anjam ke Dar se ghaTti ho aur tharraati ho

waqt-e-sahar KHamosh dhundlaka ek sitara kanp raha hai

ruKH par jis ke khel raha hai ab bhi tabassum halka halka

wo aaya ek nur ka dhaara jalwon ki bunden barsata

jagmag jagmag karta karta Dub gaya masum sitara