naqsh-bar-ab

sāl-hā-sāl mohabbat jo banā kartī hai

rishta-e-qalb-o-nazar palla-e-resham kī tarah

ek jhoñkā bhī havādis kā use kaafī hai

pahlu-e-gul meñ dhaḌaktī huī shabnam kī tarah

ye mohabbat ke banā.e hue aivān-e-buland

ek Thokar bhī zamāne kī nahīñ sah sakte

ābgīne ye bahut nāzuk-o-nā-rustā haiñ

mauj kī god meñ tā-der nahīñ rah sakte

garm-raftār subuk-sair ke rahvār-e-hayāt

ārzūoñ ke gharauñde ko ye Dah de na kahīñ

talḳh-tar jaam ke hāthoñ meñ nizām-e-nau ke

ḳhvāb kī halāvat ko de na kahīñ

ishq ke haath meñ raushan hai jo nanhā sā diyā

aql kī tund havā us ko bujhā hī degī

tū ne dekhī hī nahīñ panja-e-usrat kī giraft

ruuh ko qaid-e-tamannā se chhuḌā hī degī

gal hī jā.egī kisī roz junūñ kī zanjīr

vaqt har ḳhvāb kī ta.abīr batā detā hai

karvaTeñ letā hai ehsās jo bedārī kā

loriyāñ de ke umañgoñ ko sulā detā hai

naqsh-bar-āb hai vābastagī-e-husn-o-shabāb

nik.hat-e-gul kī tarah ishq hai pāband-e-havā

is se behtar thā ki mujh se tujhe nafrat hotī

phuul murjhāte haiñ kāñTā nahīñ murjhā saktā

tiir nafrat kā rahā kartā hai dil meñ paivast

sham.a ye tīrgī-e-ġham meñ bhī tābinda rahe

dast-e-nafrat kī banā.ī huī dīvār-e-adā

sañg-o-āhan kī tarah puḳhta-o-pa.inda rahe

azm ho jā.eñge afsurda irāde maflūj

gosh lazzat-kash-e-gulbāñg-e-jalājil kyuuñ ho

manzileñ aur bhī kitnī haiñ mohabbat ke sivā

rūh-e-āzād giraftār-e-salāsil kyuuñ ho

sal-ha-sal mohabbat jo bana karti hai

rishta-e-qalb-o-nazar palla-e-resham ki tarah

ek jhonka bhi hawadis ka use kafi hai

pahlu-e-gul mein dhaDakti hui shabnam ki tarah

ye mohabbat ke banae hue aiwan-e-buland

ek Thokar bhi zamane ki nahin sah sakte

aabgine ye bahut nazuk-o-na-rusta hain

mauj ki god mein ta-der nahin rah sakte

garm-raftar subuk-sair ke rahwar-e-hayat

aarzuon ke gharaunde ko ye Dah de na kahin

talKH-tar jam ke hathon mein nizam-e-nau ke

KHwab ki halawat ko de na kahin

ishq ke hath mein raushan hai jo nanha sa diya

aql ki tund hawa us ko bujha hi degi

tu ne dekhi hi nahin panja-e-usrat ki giraft

ruh ko qaid-e-tamanna se chhuDa hi degi

gal hi jaegi kisi roz junun ki zanjir

waqt har KHwab ki tabir bata deta hai

karwaTen leta hai ehsas jo bedari ka

loriyan de ke umangon ko sula deta hai

naqsh-bar-ab hai wabastagi-e-husn-o-shabab

nikhat-e-gul ki tarah ishq hai paband-e-hawa

is se behtar tha ki mujh se tujhe nafrat hoti

phul murjhate hain kanTa nahin murjha sakta

tir nafrat ka raha karta hai dil mein paiwast

shama ye tirgi-e-gham mein bhi tabinda rahe

dast-e-nafrat ki banai hui diwar-e-ada

sang-o-ahan ki tarah puKHta-o-painda rahe

azm ho jaenge afsurda irade mafluj

gosh lazzat-kash-e-gulbang-e-jalajil kyun ho

manzilen aur bhi kitni hain mohabbat ke siwa

ruh-e-azad giraftar-e-salasil kyun ho