naT-khaT putli

putlī maiñ sharminda huuñ

maiñ ne tere baḳhiye Tāñke ujlat meñ

tere dhāge maiñ ne kas kar bāñdhe the

tere chehre par muskān sajā.ī aur tujhe

apnī poroñ par chalvāyā jab chāhā

maiñ ne jaldī kī aur itnī jaldī kī

jitnī shāyad tere bas kā rog na thā

lekin ab sharminda huuñ

jin hāthoñ se laakh tamāshe kar baiThā

larze larze jaate haiñ ur ra.asha se

aur ab terī umr javānī vaalī hai

terī āñkheñ phail chukī haiñ

jism bharā hai miTTī se aur

log bahut mānūs haiñ tujh se

terī saaf ravānī se aur

harakat harakat phurtī se

tū bhī ab ḳhush hotī hai jab tujh par āñkheñ ruktī haiñ

log tirī jānib jab hairāñ hairāñ ho kar takte haiñ

lekin maiñ sharminda huuñ

mujh se ab ye khel-tamāsha aur na hogā

merā terā ye dikhlāvā aur na hogā

aur maiñ tujh meñ ruuh milāne vaalā huuñ

tujh se apnā ye be-qābū jism badalne vaalā huuñ

putli main sharminda hun

main ne tere baKHiye Tanke ujlat mein

tere dhage main ne kas kar bandhe the

tere chehre par muskan sajai aur tujhe

apni poron par chalwaya jab chaha

main ne jaldi ki aur itni jaldi ki

jitni shayad tere bas ka rog na tha

lekin ab sharminda hun

jin hathon se lakh tamashe kar baiTha

larze larze jate hain ur rasha se

aur ab teri umr jawani wali hai

teri aankhen phail chuki hain

jism bhara hai miTTi se aur

log bahut manus hain tujh se

teri saf rawani se aur

harakat harakat phurti se

tu bhi ab KHush hoti hai jab tujh par aankhen rukti hain

log teri jaanib jab hairan hairan ho kar takte hain

lekin main sharminda hun

mujh se ab ye khel-tamasha aur na hoga

mera tera ye dikhlawa aur na hoga

aur main tujh mein ruh milane wala hun

tujh se apna ye be-qabu jism badalne wala hun