nauha

mujh ko shikva hai mire bhaa.ī ki tum jaate hue

le ga.e saath mirī umr-e-guzishta kī kitāb

is meñ to merī bahut qīmtī tasvīreñ thiiñ

is meñ bachpan thā mirā aur mirā ahd-e-shabāb

is ke badle mujhe tum de ga.e jaate jaate

apne ġham kā ye damaktā huā ḳhūñ-rañg gulāb

kyā karūñ bhaa.ī ye e.azāz meñ kyūñ-kar pahnūñ

mujh se le lo mirī sab chaak qamīsoñ kā hisāb

āḳhirī baar hai lo maan lo ik ye bhī savāl

aaj tak tum se maiñ lauTā nahīñ māyūs-e-javāb

aa ke le jaao tum apnā ye damaktā huā phuul

mujh ko lauTā do mirī umr-e-guzishta kī kitāb

mujh ko shikwa hai mere bhai ki tum jate hue

le gae sath meri umr-e-guzishta ki kitab

is mein to meri bahut qimti taswiren thin

is mein bachpan tha mera aur mera ahd-e-shabab

is ke badle mujhe tum de gae jate jate

apne gham ka ye damakta hua KHun-rang gulab

kya karun bhai ye eazaz mein kyun-kar pahnun

mujh se le lo meri sab chaak qamison ka hisab

aaKHiri bar hai lo man lo ek ye bhi sawal

aaj tak tum se main lauTa nahin mayus-e-jawab

aa ke le jao tum apna ye damakta hua phul

mujh ko lauTa do meri umr-e-guzishta ki kitab