nawed-e-safar

maiñ bhī kuchh ḳhvāb sar-e-shahr-e-tamnnā le kar

sar meñ irfān-e-ġham-e-zāt kā saudā le kar

dil meñ armān nahīñ aag kā dariyā le kar

aañkh meñ hasrat-e-dīdār-e-tamāsha le kar

bas yūñhī uTh ke chalā aayā thā be-raḳht-e-safar

gulāb-jismoñ ke sañg sāñsoñ kā sochtā thā

ġhazāl āñkhoñ meñ ghar banāne kī aarzū thī

kisī kī zulfoñ meñ sar chhupānā bhī chāhtā thā

dil-o-nazar meñ tamām manzar hare-bhare the

sadā-e-dil par ravāñ-davāñ sā chalā to thā maiñ

magar vo manzar ki jin manāzir meñ dikh rahā thā nayā saverā

vo saare manzar har ek hasrat dhuāñ dhuāñ sī kahīñ pe ġham hai

magar maiñ ab bhī dabī dabī sī sadā-e-dil hī to sun rahā huuñ

zamāna lekin usī tarah se ravāñ-davāñ hai

udās-o-bad-dil na thā na huuñ maiñ

yahīñ se mujh ko na.e safar kī naved bhī hai

main bhi kuchh KHwab sar-e-shahr-e-tamnna le kar

sar mein irfan-e-gham-e-zat ka sauda le kar

dil mein arman nahin aag ka dariya le kar

aankh mein hasrat-e-didar-e-tamasha le kar

bas yunhi uTh ke chala aaya tha be-raKHt-e-safar

gulab-jismon ke sang sanson ka sochta tha

ghazal aankhon mein ghar banane ki aarzu thi

kisi ki zulfon mein sar chhupana bhi chahta tha

dil-o-nazar mein tamam manzar hare-bhare the

sada-e-dil par rawan-dawan sa chala to tha main

magar wo manzar ki jin manazir mein dikh raha tha naya sawera

wo sare manzar har ek hasrat dhuan dhuan si kahin pe gham hai

magar main ab bhi dabi dabi si sada-e-dil hi to sun raha hun

zamana lekin usi tarah se rawan-dawan hai

udas-o-bad-dil na tha na hun main

yahin se mujh ko nae safar ki nawed bhi hai